Politika sa kahoy
Sa wa pa suspensoha ni Kalihim Ramon Paje sa Department of Environment and Natural Resources ang pagpamutol sa mga punoan sa kahoy sa habagatang Sugbo, nag-atubang og lisod nga tahas ang lokal nga mga buhatan sa DENR ug Department of Public Works and Highways ug lokal nga mga opisyal:
• Mahimong madugangan pa ang 84 ka putlununon nga mga akasya ug ubang kahoy kun matiwas nang imbentaryo sa tanang kahoy sa Carcar City ug Sibonga; ug
• Kun pasikaran ang katakos ug kapaspas sa DPWH ug lokal nga mga opisyal sa Naga City (duha ka kahoy matag adlaw), maabtan og usa ug tunga ka buwan una maputol ang tanang kahoy.
***
Kun paundayonan ang binuang sa DPWH nga i-atol sa mga oras nga tingtrabaho ug ting-eskuyla ang pagpamutol sa mga kahoy, unsaon man nila pagtak-op ang nasudnong highway nga di mapilde ang ekonomiya sa Sugbo ug ang panginabuhi ug patigayon sa mga Sugbuanon?
Sa ilang pataka nga hukom pagtak-op sa trapiko sa Naga, hingpit nga gisalikway sa DPWH, DENR ug lokal nga mga opisyal ang kamahinungdanon sa highway isip bugtong sumpay sa habagatang Sugbo ug silingang isla sa Negros ngadto sa Metro Cebu nga maoy nahimutangan sa mga pantalan, tugpahanan, mga tindahan ug kamerkadohan sa gitumod nga mga utanon, hayopan, mga lagutmon ug ubang mga produkto ug serbisyo.
***
Samtang di ko andam nga molalis sa sangpotanan sa imbentaryo sa DENR nga di na matabang ug busa kinahanglan na gyu’ng putlon ang pito ka akasya sa Naga, 77 ka punoan sa San Fernando ug upat ka punoan sa Perrelos, Carcar, nakabatyag ko nga may haw-ang.
Bisan nipasalig ang DENR nga nabansay-bansay sa University of the Philippines sa Los Baños ang ilang forresters nga naghimo sa imbentaryo, mangahas ko pagsugyot nga hatagan og higayon ang ubang mga eksperto pagsusi may mga paagi pa bang maluwas ang mga kahoy. Ug gihangop ni DENR-7 Director Isabelo Montejo ang pahibawo sa Movement for a Livable Cebu pagpakitabang sa mga eksperto sa kaulohan.
***
Bisan uwahi na, angay’ng dasigon ang pagpanginlabot na ni Gobernador Junjun Davide sa kontrobersiya. Kun mapamatud-an sa independenteng mga eksperto nga masakiton ug hulga na gyu’ng mga kahoy sa kinabuhi ug kabtangan, gikinahanglan ang liderato ni Davide aron may makapataliwa sa wa magkasinabtanay nga nasudnong mga buhatan.
Tan-awa ra gud: DENR ang unang nisugyot nga sa gabii himuong pagpamutol; apan tungod sa ilang away nga niabot na sa hukmanan, niinsistir ang DPWH nga himuon gikan sa alas-9 sa buntag hangtod sa alas-4 sa hapon; apan dihang giluwatan sa Naga City Hall ang samang sugyot, niuyon dayong DPWH ug gitakdang pagpamutol sugod sa alas-9 sa gabii hangtod sa alas-3 sa kadlawon.
- Latest
