Manakop lang kun suguon sa hepe

Magpasalamat ko kanila ni Cebu City Vice Mayor Edgardo Labella ug Cebu City Police Office director Noli Romana kay kun dili pa tungod sa ilang kamandoan walay gihimong pagpangsakmit sa mga video karera ug moli-moli ang kapolisan dinhi sa dakbayan.

Aw kun duna man tingali pagpangsakmit, ginagmay lang, aron ingnon. Apan diha nga atong gitug-an ngadto ni Vice Mayor Labella nga mikuyanap na pag-ayo ang mga video karera dinhi sa dakbayan, diha-diha kini nga gipahimoan og aksyon nila ni Labella ug Romana.

Diha-diha, 38 dayon ka video karera ug moli-moli ang nasakmit gikan sa Barangay Calamba, Pasil ug Ermita. Human sa mao nga pagsakmit, gitug-anan ko ni Ermita Barangay Captain Imok Rupinta nga daghan pa gihapong karera ang nag-operate sa iyang dapit.

Akong gikontak si Romana ug gipasaligan nga himoan dayon og operasyon. Tuod, Domingo sa hapon, ang mga sakop sa Carbon Police Station misakmit dayon og dugang 10 ka video karera ug mga moli-moli.

Gisakmit usab sa mga polis ang laing mga video karera nga gibalik na usab unta pagbutang didto duol sa barangay hall sa Pahina-San Nicolas. Pastilan, ngano kaha nga si Kapitan Antonio Caruzca wala man molihok aron dili maka-operate ang karera sa iyang dapit?

Ang akong inpormer sa barangay Pahina-San Nicolas nga sakop ra ni Caruzca mitug-an nga duol sa gibutangan sa mga karera aduna pa'y suyopanan og shabu. Siyaro, ako nasayod unya ang kapitan wala? Tell that to the dead marines!

Dili na lang nako ipublikar ang mga ngalan sa tag-iya sa balay nga gibutangan sa karera kay makabantay lagi, kuhaon dayon. Ihilom lang nato pagtugyan ang atong report ngadto sa kapolisan.

Hilom lang kaayo ang operasyon sa video karera sa milabay nga mga buwan. Mga bag-o nga ngalan ang mitumaw. Diha sa Ermita, babaye ang mitumaw nga ngalan sa nag-operate sa video karera.

Usa sa akong mga inpormer mitug-an sa bodega nga adto mag-assemble sa video karera. Ang pangutana lang, ngano nga ang mga polis dili man mohimo'g paspas nga kampanya? Ngano nga maghuwat man sila nga adunay birada gikan sa media?

Pagsakmit niadto'ng dugang napulo ka video karera ug moli-moli didto sa Ermita niadtong Sabado, ang akong inpormer nga diha ra naniid, nakadungog nga usa sa mga polis miingon nga "Wala mi mahimo kay dunay mireklamo ngadto ni CD." Ang gipasabot mao si city director Romana.

Menus ko og pagdayeg sa mga polis diha sa Carbon kay tiaw mo, ang mga karera gi-operate diha sa Sitio Baho, Sitio Bato ug Sitio Ermita Proper dapit sa baybayon, apan ngano'ng gipasagdan ra man ninyo nga kaduol ra ana gikan sa inyong police station?

Kun abtikon lang ninyo ang mga dunggan ug mata, ang operasyon sa video karera ug moli-moli klaro kaayo nga masumpo dayon. Bisan gani ang illegal nga drugas, sayon ra madakpan ang mga level 1, level 2.

Mas motuo ko nga lisud dakpon ang mga druglord kay dili man sila mohikap og shabu. Ang ilang mga bata-bata kun madakpan dili man 'sab g'yud motug-an nga sila maoy druglord, apan kun ang mga level 1 ug level 2 gipasagdan ra gani, makaduda na kita.

Kamo nga mga polis, pakita g'yud mo og maayo nga lihok kay saludohan mo nako, apan kun magtapol, dili ko magpanuko sa pagsaway kaninyo.