Pagpabarug sa Pavilion
Sa Pebrero pa karong tuiga nga nagsugod ang Duros Development Corporation pagpakatap sa ilang mga trabahante ug higanteng mga ekipo sa lima ka ektarya nga luna sa Artsidyosesis sa Sugbo nga gitakdang himoan sa kalibotanong tigom sa Simbahang Katoliko nga gipanghinaot nga tambongan ni Pope Francis duha ka tuig gikan karon.
Apan Hunyo na karong tuiga nakasugod ang aktuwal nga trabaho. Ang hinungdan? Kasaligang mga tinubdan nagbutyag nga ang orihinal nga desinyo sa International Eucharistic Congress Pavilion, nga gitumong alang sa 15,000 ka delegado gikan sa nagkalainlaing kanasuran sa kalibotan, lisod nga tukuron. Gani usa ka tagduma sa proyekto nitug-an namo nga imposibleng mapatuman ("inconstructable") ang orihinal nga plano.
***
Ang pagbag-o sa desinyo sa pavilion, nga gitakdang iladlad sa duha ka ektarya nga dakong hawan, maoy hinungdan nga ang giuna pagtrabaho karon mao ang "Minore," gamayng bahin sa Pavilion nga pahimutangan sa mga lawak saringan ug dormitoryo sa mga seminarista.
May nakuha na nga laing arkitekto nga maoy mohimo sa bag-ong desinyo sa Pavilion. Naglisod hinuon ang mga tagduma unsaon pagpuli sa orihinal nga designer nga gihulagway nga suod sa kaparian ug nakahimo na og pipila ka proyekto alang sa artsidyosesis. Maong giprangkahan nila ang mga sinaligan ni Cebu Archbishop Jose Palma nga motunhay lang ang trabaho kon di na makapanghilabot ang orihinal nga designer.
***
Labing dakong bahin sa gasto pagtukod sa Pavilion maggikan sa Duros Land Properties Inc. nga gipanag-iya sa magtiayong Rafaelito ug Fe Barina. Nipasalig sila sa paggasto og hangtod P300 milyones alang sa proyekto. Ang nahibilin nga P80 milyones pagtiwas sa Pavilion gipanghinaot nga matigom sa tanang simbahan di lang sa Sugbo kon dili sa tibuok Pilipinas.
Ang convention center sa ground floor kapahimutangan og kapin 15,000 ka hunulhunol nga mga lingkoranan. May basement nga magsilbing parking area alang sa 250 ka sakyanan. Tukoran sab og hangtod 200 ka pansayan. Ang kinatibuk-ang gitas-on sa Pavilion motupong sa tulo ka andana nga building.
***
Gitanyag sa Duros ang pag-abaga sa labing dakong bahin sa gasto sa proyekto bugti sa katungod pag-develop sa nahibilin nga tulo ka ektarya nga bakanteng luna sa luyo sa Seminario Mayor buyong sa St. John Paul II Avenue sa Barangay Mabolo sa Dakbayan sa Sugbo.
Kasaligang tinubdan nagbutyag nga inigkahuman sa International Eucharistic Congress sa 2016 usbon ang Pavilion aron gawas sa pagka convention center maggamit sab alang sa ubang kalihokang patigayon. Nasabotan sab nga ang umaabot pribadong nga mga negosyo nga pasudlon sa luna di makahasol ni makaiban sa ka-solemne sa pagtuon sa mga seminarista. Hinunoa makapalambo sa talagsaong luna sa Sugbo sa kasaysayan--ang pagka duyan sa Kristiyanismo di lang sa Pilipinas kon dili sa tibuok Asya.
- Latest
