Grand Halad sa Kapamilya
Cebu Technological University, Cebu City -- Nakabuylo gyong labing dakong piyesta sa libreng mga pangalagad. Kaliboan ka Sugbuanon ug taga kasilinganang mga lalawigan ang nagsawo sa lunsay nga pagtinabangay sa tibuok adlaw.
Pagtapos sa tibuok buwan nga kasaulogan sa ika-19 nga anibersaryo sa pagsibya sa DYAB Abante Pa, Bisaya!, nagtapok dinhi ang mga indibiduwal, kompaniya, kahugpongan ug mga buhatan sa gobyerno nga gustong motabang sa atong mga Kapamilya nga labing nagkinahanglan.
***
Labing gipunsisokan ang libreng konsultasyon ug mga tambal pinaagi sa dul-an 100 ka doktor gikan sa Cebu Doctors University Hospital (33) nga gipangulohan ni Dr. Pek Eng Lim, Cebu City Medical Center (5), Cebu City Health Department (5), St. Anthony Mother and Child Hospital (3), Dr. Ignacio Cortes General Hospital (2), Tojong Maternity and General Hospital (2), Eversley Childs Sanitarium (2) ug Super Care Cebu (2). Giabagan sa nurses Philippine Nurses Association (75), St. Vincent General Hospital (5) ug St. Anthony Mother and Child Hospital (2).
Libreng mga tambal gikan sa San Miguel Corporation Community and Employees Credit Cooperative, Department of Health, Ms. Faith Fiedacan, USC Campus Lions Club, GV-Pharma King Inc. ug ABS-CBN Foundation.
***
Libreng limpiyo o ibot sa ngipon pinaagi sa Philippine Dental Association Cebu Chapter uban sa Juanito King Foundation, Naval Forces Central, Philippine Air Force, 53rd Engineering Brigade, Central Command, Philippine Coast Guard ug Alo Dental Clinic.
Gatosang nakapahimus sa libreng paghiling sa mata ug mga antipara pinaagi nilang Dr. Ma. Theresa Garces, Dr. Christine Fernandez (Eye Solution), Dr. Angie Fernandez (Eye Browse Optical) ug Association of Concerned Texters ug libreng laboratory services sa Chong Hua Hospital, Cyber Medical and Diagnostics Laboratory ug Radioactive Medical Laboratory & X-ray.
***
Nialagad sang LTO, BIR, GSIS, NBI, NSO, PhilHealth, Tesda, SSS, Pag-Ibig, DFA ug Cebu City Local Civil Registrar. Libreng serbisyo ug notaryo sa mga abogado pinaagi sa Ruiz Payot and Montenegro Law Office uban sa Phil. Guardians, Gullas Law School ug IBP Cebu Chapter. Libreng pag-atiman sa mga iro ug iring sa Cebu Veterinary Doctos ug Cebu City Veterinarian's Office.
Daghang nakapaayo sa ilang cell phones, laptops ug desktops pinaagi nilang Adrian Guanzon, Dante Babida, RC Goldline ug 1Ware Tech Solutions.
***
Libreng masahe ug reflexology sa IPI, San Roque Reflexology ug buta nga mga masahista sa Kapamilya Negosyo Na! Libreng tupi sa Navforcen. Nagbaha sang mga hinabang pagkaon, lugaw, pan, ice cream ug kape gikan sa Freeman Foundation, Good Day Coffee, Save the Children, Rulls Bakeshop, Bantay Bata 163 Cebu ug ubang manggihatagong mga Sugbuanon.
Dungan sang Kapamilya Local ug Overseas Job Fair sa SM City Consolacion nga gipasiugdahan sa Munisipyo sa Liloan. May libreng seminars ug workshops sab. Labihang daghana pa sa ubang mga pangalagad apan pasayloa nga nahutdan na ko og luna.
***
Email: [email protected]
- Latest
