Aron lang g'yud sila daygon

Daghan g'yud ang nagduda sa tinuoray'ng tumong niini'ng mga senador nga saba kaayo aron sila daygon sa katawhan atol sa pagdiskutir nila sa Pork Barrel Scam.

Kunohay ang ilang gihimo gitumong aron nga masuta nila kun unsa ang angay'ng balaod nga pagamugnaon apan dili kini makatabon sa tinuoray nila nga katuyoan nga aron makakuha sila og pagdayeg sa katawhan ug natural, humot sila sa sunod eleksyon.

Ang mga sabaan kaayo nga senador naglakip nila ni Franklin Drilon, Teofisto "TG" Guingona III, Alan Peter Cayetano ug Chiz Escudero. Wala molampos si Guingona pagkuha sa pagdayeg sa katawhan kay sa Pulse Asia survey sa miagi'ng buwan anaa ra siya sa ika-19.

Nindot g'yud tinuod nga gamiton ang isyu sa Pork Barrel Scam aron ang ambisyoso nga kandidato mosikat sa katawhan ug makadaog sa gitinguha niya nga pwesto sa eleksyon unya sa 2016.

Dili imposible nga kini'ng mao nga mga senador nagtinguha paglansar og taas nga katungdanan sa kagamhanan mao nga pagka karon pa lang daan, mamugas-pugas na sila aron mailhan sa katawhan.

Ang mga tawo usahay nga magtan-aw sa telebisyon ingon sa makapangyam-id na kun makita nila ang mga senador nga ilang nasabtan nga nagpa-bilib ra aron nga daygon sila sa katawhan.

Tukma nga himuon sa mao nga mga senador nga maghuna-huna sila og unsay mga balaod nga angay'ng mugnaon nga makahatag og kaayohan sa kinabag-ang katawhan sa nasud kay mohimo'g lakang aron lang g'yud modayeg kanila ang publiko.

Pahinumdoman nato ang mga senador nga ang balay-balauranan dili dapit nga anha sila maghimo og susama sa tele-nobela kondili dapit kini nga sagrado ug anha pandaya ang mga mahinungdanong balaod.

Ang maayo nga himuon karon mao ang pagpaabot nga sugdan na sa Sandiganbayan ang paghusay sa kaso nga gisang-at batok sa mga senador nga gikatahapan nga nakabulsa og minilyon nga salapi gikan sa ilang Pork Barrel Funds.

* * *

Dinhi sa dakbayan sa Sugbo, mora'g gibiyaan na g'yud sa hingpit sa mga kontraktor nga gikuha sa Department of Public Works and Highways ang karsada nga wala pa nila mahuman sa pag-aspalto.

Ang gipasabot nako mao ang Gorordo Avenue ug ang Veterans Drive, pareho nga nahimutang sa Barangay Lahug. Nahisama lang ko sa "buak nga plaka" niini nga isyo kay sige og balik-balik apan ingon sa wala lang magtagad ang kadagkoan sa DPWH.

Basin og nagtuo ang mga opisyal sa DPWH nga mailad ang katawhan. Nabantayan nako nga duha ka sapaw ang pag-aspalto sa karsada apan wala kini himoa sa pipila ka bahin sa Veterans Drive.

Kanang karsada gikan sa eskena Gorordo ug Salinas Drive paingon na sa Marco Polo Plaza Hotel wala na g'yud matandog mga duha ka buwan na. Nabantayan nako nga laktaw-laktaw ang ilang pag-aspalto didto sa unahan nga bahin sa Marco Polo Hotel.

Wala usab sapawi ang aspalto nga una nila nga gibutang sa karsada mao nga klaro kaayo ang ilang agi nga nagbawod-bawod. Ang kuyaw lang niini kun pirmahan na sa DPWH ug ibutang nga kompleto na ang mao nga proyekto.

Ang Gorordo Avenue ug Veterans Drive maoy mahimoan kanunay nako og ehemplo sa bati nga trabaho kay anaa ko mag-agian diha kada adlaw. Sa ubang mga karsada nga gipang-aspalto gihapon sa DPWH basin susama gihapon niini ang sitwasyon.

* * *

Mentras wala pa makamugna og dugang karsada ug wala pa mapalapdi ang mga karsada nato dinhi sa Sugbo, ilabi na sa dakbayan, angay na tingali nga pugngan nato ang pagdagsang sa mga sakyanan nga managan.

Ang maayo nga himuon mao nga kadtong mga dunot na nga sakyanan nga wala g'yud atimana sa ilang mga tag-iya, dili na g'yud padaganon pa. Anaa man kini sa balaod nga ang mga dilapidated nga sakyanan dili na padaganon, apan unsaon nga wala man tumana ang balaod.

Ang karaang modelo sa sakyanan walay problema basta giatiman lang ug wala magkagidlay.