Husay sa korte ni Gloria
Duha ka daotang balita human na-raffle sa Sandiganbayan ang mga kasong plunder batok nilang Janet Lim-Napoles, Juan Ponce Enrile, Jinggoy Estrada, Bong Revilla ug ubang mga sinumbong sa P10 bilyones nga pork barrel scandal:
•Una, wa mag-apura ang mga mahistrado sa Sandiganbayan sa pagpaggawas og warrant of arrest batok sa mga sinumbong kay kinahanglan pa nila nga basahon ang tanang nagtumpi nga mga dokumento nga gisumiter sa buhatan sa Ombudsman una matino na may igo bang sukaranan ang pagpasaka sa mga kaso; ug
•Ikaduha, mayoriya sa mga mahistrado tinudlo ni kanhi presidente Gloria Arroyo ug suod sa pipila ka sinumbong.
* * *
Sa 14 ka mahistrado sa Sandiganbayan, napu ang tinudlo ni Arroyo: Roland B. Jurado, Efren N. De La Cruz, Teresita V. Diaz-Baldos, Jose R. Hernandez, Rodolfo A. Ponferrada, Alexander G. Gesmundo, Samuel R. Martires, Napoleon E. Inoturan, Alex L. Quiroz ug Maria Cristina J. Cornejo. Pulos mas taas ang ilang termino kay ni Presidente Noynoy Aquino. Labing sayong moretiro mao si Baldos karong Hulyo 22, 2016, dul-an usa ka buwan human sa pagkanaog ni Aquino sa Malakanyang, ug si Hernandez karong Nobiyembre 22, 2016.
Si Associate Justice Gregory S. Ong nga naletratohan uban nilang Napoles ug Estrada tinudlo ni kanhi presidente ug karon Manila City Mayor Joseph Estrada. Ang tulo ka tinudlo ni Aquino mao silang Presiding Justice Amparo M. Cabotaje-Tang ug Associate Justices Rafael R. Lagos ug Oscar C. Herrera Jr.
* * *
Labing demalas sa tanang sinumbong si Enrile kay ang iyang usa ka kasong plunder ug 15 ka kasong pagpangawkaw nitugpa sa third division nga gipangulohan ni Presiding Justice Tang uban nilang Martires ug Quiroz. Ang usa ka kasong plunder ug 11 ka kasong pagpangawkaw ni Estrada nitugpa sa fifth division nga giduma nilang Jurado ug Gesmundo. Samtang ang usa ka kasong plunder ug 16 ka kasong pagpangawkaw ni Revilla nitugpa sa first division nga gipangulohan ni Associate Justice Cruz uban nilang Ponferrada ug Lagos.
Si Revilla ang gipasanginlang nakakawat og labing dako, P517 milyones. Sunod si Enrile nga giingong nakabulsa og P345 milyones. Dayon si Estrada nga gitumbok nga nakakawkaw og P278 milyones.
* * *
Giapil sa plunder ug busa di sab makapiyansa kun ipadakop na ang mosunod: lawyer Jessica Lucila "Gigi" Reyes, kanhi chief of staff ni Enrile, nga gilumpong sa kaso ni Enrile; Pauline Labayen, kanhi deputy chief of staff ni Estrada, nga gilumpong sa kaso ni Estrada; ug lawyer Richard Cambe, kanhi chief of staff ni Revilla, nga gilumpong sa kaso ni Revilla.
Kaubang mga sinumbong sa tanang tulo ka senador silang Napoles ug John Raymund De Asis, kawani ni Napoles. Kaubang sinumbong nilang Enrile ug Revilla si Ronald John Lim, pag-umangkon ni Napoles.
* * *
Email: [email protected]
- Latest
