Kudos sa mga nagdakop ni Pachoy

Pagakpakan nako ang kapolisan nga nakadakop ni Manuel Richard Corominas nga naila sa angga nga Pachoy. Grabe ka kriminal kini si Pachoy kay miangkon man siya sa interview sa mga reporters nga gipatay niya kadto'ng pag-umangkon ni Cebu City Vice Mayor Edgardo Labella.

Saludo ko ni Superintendent Romeo Santander, hepe sa Cebu City Police Intelligence Branch, nga maoy nangulo sa pagdakop ni Pachoy kaniadto'ng Domingo sa kaadlawon.

Diha nga si Pachoy gipresentar ngadto sa media kagahapon, iyang giangkon nga ang ilang grupo mao diay usab ang mihimo niadto'ng sunod-sunod nga pagpang-karnap og mga sakyanan unya duha sa mga biktima gipusil. Grabeha ni'ng mga tawhana uy!

Base sa rekord sa kapolisan nga ang paryente ni Labella nga si Rolan Colina gipusil ug gipatay ni Pachoy tungod sa isyo sa shabu. Sagdi na lang kay pareho man sila nga nalambigit sa binuang.

Apan kadto'ng uban nga gibiktima ni Pachoy, apil ang usa ka babaye nga si Eleanor Rivera nga giilogan niya'g sakyanan didto sa bukid, maisip nga pagpanamas-tamas.

Tiaw mo, gikan nga nangawat og mga sakyanan ang grupo nila ni Pachoy, naagian lang nila si Rivera nga nagparking didto sa Ayala Heights sa Barangay Pung-ol Sibugay ug ila dayon nga gipusil ug giilogan og sakyanan.

Sa wala pa pusila si Rivera, ang grupo ni Pachoy nangilog na og taxi didto sa Talisay. Gibilin nila ang drayber ug mipasirit sila paingon sa bukid luwan sa taxi.

Dunay tawo nga nag-motor nga ilang nasundan, gipabag-iran ug natumba. Gikanaog nila og gipusil, giilogan sa motor. Diha'y laing nag-motor nga nahiagi ug nagtuo nga aksidente lang ang hitabo, apan gibunalan ni Pachoy og armas ang ulo.

Gibiyaan nila ang taxi ug gisakyan nila ang motor. Pag-abot sa unahan didto na nila makit-i si Rivera. Nangilog pa g'yud sila'g multicab pag-abot sa unahan. Grabe kaayo ang gihimo nila ni Pachoy.

Nasabot nako nga kini si Pachoy mahigugmaon sa iyang pamilya kay mao man gani kini ang rason nga nadakpan siya kay gibisitahan niya sila didto sa ilang gipuy-an.

Apan ngano nga wala ma'y kaluoy kini si Pachoy sa uban niya nga gibiktima nga walay mga sala? Angay ba nga siya kaluy-on?

* * *

Ang gihimo nila ni Supt. Santander nagpaila lang nga kun ang kapolisan mogamit g'yud sa ilang utok, madakpan gayud ang mga dakponon.

Kun usa pa ako ka polis o kaha sakop sa law enforcement unit, pangitaon nako ang mga dakponon nga idlas kaayo dakpon. Apan nasubo ko sa akong nahibaw-an nga ang ubang mga dakponon wala lang dakpa kay suod sila sa mga opisyal.

Sama gud sa lider sa PBMA nga si Ruben Ecleo nga hangtod karon wala gayud dakpa sa mga tinugyanan sa balaod. Sigurado ko nga kun sinsero lang ang mga polis nga mangita kaniya, madakpan ra nila si Ecleo.

Usbon nako, saludo ko ni Santander ug kaubanan ug dasigon pa nako sila nga motrabaho pa g'yud.

* * *

Nakadawat ko og report gikan sa tigpaniid nako diha sa Sitio Caduloy, Tisa nga mihasi pag-ayo ang pagpamaligya og shabu diha, ang pag-operate og video karera ug ang sugal nga masyaw.

Unsa man kini'ng mga sakop sa Punta Princesa Police Station wala gayud kamo mohimo og lakang kabahin niini? Angay tingali nga ang mao nga mga polis ipanglabay sa lagyo nga dapit kun wala sila'y himuon.