Nagpabuang-buang

Bisan klaro nang gibuang ni Janet Lim Napoles ang kadagkoan sa gobiyerno, nipaundayon ang mga hingtungdan sa nangalisbo niyang salida:

•Nilampos si Napoles paggawas sa Fort Santo Domingo sa Laguna aron pagkarakara og paopera sa gamay kaayong bugon nga way bisan gamayng timaan sa kanser;

•Bisan sa kayano ug kamalampuson sa operasyon naabtan siya og duha ka buwan sa Ospital ng Makati (OsMak) bisan giluwatan nang release order niadto pang Mayo 6; ug

•Dihang nimando na’ng korte pagpabalik niya sa Laguna, nikalit lang siya og paluya-luya ug pasangil, nga gidasonan sab dayon sa mga doktor nga nagharab-harab pagopera niya, nga nagdugo.

***

Segun sa iyang abogado, nainsulto si Napoles sa pangagpas sa usa sa iyang mga doktor nga nagdugo siya tungod sa pakighilawas. Matod ni lawyer Bruce Rivera imposibleng makahigayon pa sa pakighilawas si Napoles kay kanunay nga magsud gawas ang nurses ug 24 oras matag adlaw ug pito ka adlaw matag semana siyang giguwardiyahan sa mga polis.

Apan mga hulagway nga gi-post ni Rivera sa Facebook nagpakita ni Napoles nga malipayong niatiman sa mga bisita sud sa iyang kuwarto sa OsMak. Naapil pa gani sa letrato nga nindot kaayong pagkahimo ang iyang French tip nga manicure. Gawas sa pagpasud-gawas sa manikyurista ug bisan kinsa na lang bisita unsa pa kahay ubang gihimo ni Napoles sa OsMak?

***

Klarong mas luag ang seguridad ni Napoles sa OsMak kay sa Fort Santo Domingo. Kinsa may nagtugot sa inahan ni Rivera ug sa ubang mga bisita nga di sakop sa pamilyang Napoles ni partido sa mga kaso nga iyang giatubang sa pagsud-gawas sa iyang kuwarto?

Kinsa may nagsugo sa guwardiyang mga polis sa paglingiw sa pagsud gawas sa di gyud unta angay’ng pasudlon ang mga bisita nga niatiman sa iyang kuko ug ubang mga panginahanglan? Kabahin na ba ni sa sekretong kasabutan paghimo ni Napoles nga state witness bugti sa paglambigit sa mas dagkong isda sa mga eskandalo?

***

Pasayloa nga nakaingon ko nga nagpaundayon lang silang Justice Secretary Leila de Lima ug ubang mga opisyal sa gobiyerno sa klarong pagbuang ni Napoles nila. Apan ang mosunod maoy akong sukaranan:

•Dihang nihatag og lista si Napoles kang De Lima, giapura sa tanan si De Lima pagbutyag sa listahan;

•Dihang napugos na si De Lima pagbisto sa listahan tungod sa supina sa Senate Blue Ribbon Committee gihulagway sa kasagaran ang listahan nga way kapuslanan kay way mga ebidensiya;

•Gani, gipasanginlan na si Napoles nga gigamit nilang Senador Juan Ponce Enrile ug ubang mga sinumbong sa plunder sa P10 bilyones nga pork barrel scandal paglawgaw sa kontrobersiya;

•Karon giapura na sab si Napoles pagsumiter sa iyang affidavit nga gitunglo nang daan nga di angay’ng tuohan.

***

Email: [email protected]