Panglawgaw sa kampanya
Napriso na si kanhi presidente Gloria Arroyo. Napriso sab ang kanhi hepe sa Philippine National Police, si Heneral Avelino Razon. Sa di madugay mangapriso na sab silang Senador Juan Ponce Enrile, Senador Jinggoy Estrada, Senador Bong Revilla ug ubang dagkong opisyal sa gobyerno nga gilambigit sa P10 bilyones nga pork barrel scandal.
Siyaro may magduda pa gihapon sa determinasyon ni Presidente Noynoy Aquino paggukod sa gipasanginlan nga mga kawatan sa nangaging mga pamunoan ug sa iya mismong administrasyon. Bugtong nahimo sa mga naigo sa kampanya mao ang pagpasangil nga biktima sila sa pagpanggukod sa pamunoan nga gitumong paglipat sa katawhan gikan sa tinuod nga mga suliran sa nasud.
***
Ato hinuon ning klaruhon. Di pa mapriso ang mga gikiha sa Ombudsman og plunder ugma dayon. Makahimo pa sila pagpasaka og motion for reconsideration aron pag-awhag sa Ombudsman pagsubli sa mga ebidensiya ug pagbakwi sa resolusyon pagsang-at sa mga kaso ngadto sa Sandiganbayan.
Bisan mapasaka nang mga kaso sa Sandiganbayan way garantiya nga kaluwatan dayon og warrant of arrest ang mga sinumbong. Tungod hinuon sa kasibaw sa kontrobersiya lisod tuohan nga magmika ang mga maghuhukom. Bisan di kapiyansahan ang plunder, makahimo ang mga sinumbong pagpasaka og petisyon sa pagpiyansa alang sa temporaryo nilang kagawasan. Ginamit ang argumento nga huyang ang mga ebidensiya sa prosekusyon batok nila.
***
May sukaranan ang sibaw nga mga awhag nga angayng paspasan sa Sandiganbayan ang paghusay sa mga kasong plunder ug pangurakot batok nilang Enrile, Estrada, Revilla ug ubang mga sinumbong. Di mosugot ang katawhan, nga nangasuko sa pagbolsa sa P10 bilyones sa buhis nga ilang hinagoan, nga mahiagom ang eskandalo sa naandan nga kalangay.
May sukaranan sang sugyot nga yawe sa pagpatulin sa husay sa mga kaso ang pagpriso sa mga sinumbong. Di sila mahitabong maglangay-langay kon tanggungon samtang magpadayon ang husay. Wa hinuoy makapugong nila pagdangop sa naandang mga lusot--ang kahinog na sa pangedaron ug ang kalit nga kamasakiton.
***
May lain pa hinuong panglawgaw ang mga kaatbang sa kampanya ni Aquino batok sa pangurakot: Nga mga lider ra sa oposisyon ang giinitan apan wa tandoga ang mga alyado sa administrasyon nga naapil sab sa eskandalo.
Ambot diing langoba nagpuyo ang mga nikalawat sa linya. Kon giablihan ang ilang mga mata mabantang unta nga nabisto ang kalambigitan sa mga alyado ni Aquino, bahala na kon di pa sila alyado pagkahitabo sa mga transaksiyon, kay wa niya hilabti ang trabaho sa mga imbestigador sa Department of Justice (DOJ) ug Commission on Audit (COA) nga pulos niya tinudlo. Kon si kanhi presidente Arroyo pay nagtungkawo sa Malakanyang ang mga kasong naglambigit sa iyang mga suod di unta makairog bisan usa na lang ka dangaw.
***
Email: [email protected]
- Latest
