Atake sa mga sum

 Sud na ron sa pila ka buwan nga daghang manggawas nga sum (itom nga hulmigas nga di mamaak) matag gamit nako sa Chromebook. Kay kadiyot ra man kong maggamit ug wa man grabeng mahasol, wa ko magtagad pagsusi kon giganahan bang mga sum pagpuyo sa baratuhon nga laptop sa Google o may laing nakadani nila duol sa akong gibutangan sa Chromebook.

Pagka-Biyernes sa gabii, gipahibawo ko sa akong asawa nga nakabantay siya sa pagdaghan sa mga sum. Kay mas una man kong nakakita sa mga sum, mora kong eksperto nga nisulti niya nga pangitaon nako unsay nakapadani nila. Tingali may nabiyaan ming pagkaon nga ilang natultolan ug gitabangan pagkitkit.

***

Nakit-an nako nga usa sa ilang gipunsisokan mao ang plastik nga botelya nga akong gibutangan og pinong bas nga akong kinuha sa Boracay. Di na kaayo eksperto paminawon ang akong tingog nga nisugyot sa akong asawa nga ibalhin nako ang botelya sa pikas nga bahin sa kuwarto ug among tan-awon mosunod bang mga sum.

Haskang kuganga nako pagka-Sabado sa buntag dihang nakit-an nga nagdagtom sa kaitom sa mga sum ang tibuok sawog sa kuwarto. Nanukad na ko og pasalig sa akong asawa nga nakakita na ko og sayon kaayong sulbad: Ako rang ibalhin ang plastik nga botelya ngadto sa gawas sa bay.

***

Wa hinuon kong kabuylo. Iya kong giingnan nga mas kuti ug malukpanon ang gihimo sa among hardinero nga motunga matag Huwebes: Gibulit niya og duga sa sili ang kable sa internet nga giagian sa mga sum paingon sa among bay ug gitapakan og glue ang lungag sa bungbong aron wa na silay kaagian.

Apan human lang sa pila ka oras, nakakita ang mga sum og laing agianan. Mas nidaghan pa gani hinuon. Ug human sa kapin sa adlaw nilukop na sa among sawog. Kay may importante man kong lakaw, gidalidali nako og silhig ang mga sum ug gitugyan ang problema ngadto sa kinakusgang tigsulbad sa problema sa bay.

***

Nakabantay ko og gamayng panulisok sa tingog sa akong asawa pagbalik nako pagka-udto: Nawa na ang mga sum. Iyang sulbad? Gibalikbalikan niya og trapo ang ilang agianan. Kay iyang na-Google nga ang labing epektibong paagi pagbadlong nila mao ang pagpapas sa mga lama sa ilang mga lakang aron nga wa na silay subayon.

Nga mao tingali hinungdan nga nakasunod sila sa plastik nga botelya, nga nalukop sa ilang mga lakang, o baho, o laway, o unsa pay uban nilang mga timaan. Nabalaka hinuon ang akong asawa nga mamalik gihapon kay nahigam na og pangutkot sa among kahoy. Maong nidangop mi sa kontraktor sa among bay. Kinsa igo lang ni-text: "Ayaw lang ninyo og patya kay suwerte baya na."

***

Email: [email protected]