Sulbad sa suholan

Katapolan sa Kongreso maoy gamot nga hinungdan sa makauuwaw nga pagluok sa minimum nga suholan sa mga mamumuo sa Sugbo ug ubang bahin sa nasud. Nga mao say hinungdan nganong nagpabiling kabos ang kinabag-an sa mga Pilipinhon bisan sa kalamposan ni Presidente Noynoy Aquino paghimo sa ekonomiya sa Pilipinas nga usa sa labing lig-on ug malambuon sa tibuok Asya.

Pagpugos sa Kongreso pagtuman sa batakan niyang tahas ang usa sa gikinahanglan aron nga makaangkon ang mga anak sa singot sa makiangayon nilang bahin sa ekonomikanhon nga paglambo. Nga makatabang sa pamunoang Aquino pagpadali sa pagpakatap sa mga benepisyo sa malambuong ekonomiya ngadto sa labing kabos nga hut-ong sa populasyon.

***

Trabaho sa Kongreso ang pagsubli ug pag-umol og mga lagda sa suholan sa mga mamumuo. Apan niadtong 1989 gipasa nila ang trabaho ngadto sa National Tripartite Wages and Productivity Commission (NTWPC) ug sa Regional Tripartite Wages and Productivity Board (RTWPB). Gitawag ang nangalisbo nilang salida sa katapolan nga Wage Rationalization Act (Republic Act No. 6727).

Human gitahan ang ila gyod untang trabaho, padayon nga nagpaugat ang mga senador ug mga kongresista pagpanghilabot sa di ilang gimbuhaton--ang pagpatuman sa mga proyekto ug ang pagwaldas sa labing menos P10 bilyones nga buhis sa katawhan pinaagi sa peke nga mga proyekto (hangtod nga nabasura ang pork barrel system sa niaging tuig).

***

Ang pagpaundayon sa katapol sa Kongreso nisangpot sa hingpit nga pagluok sa mga paningkamot sa mga mamumuo pagkab-ot og mas tawhanon ug makiangayon nga suholan ug benepisyo. Kay ang duha ka representante sa labor sa RTWPBs sayon ra kaayong gipahilom sa nagkonsabo nga lima ka representante sa management ug sa gobyerno.

Mas dakong kadaot nga nahimo sa RTWPBs mao ang pagbuak-buak sa mga mamumuo. Inay nga mobarug uban ang usa lang ka nasudnong tingog, nabahin-bahin sila sa pagpasaka og buwag nga mga petisyon alang sa usbaw sa managlahi nga minimum nga suholan sa matag rehiyon. Nga nisangpot sa dakong eskandalo: Ang minimum nga suholan sa Metro Manila (P466) labaw na og P139 sa minimum nga suholan sa Sugbo ug Central Visayas nga P327.

***

Padayong maluok ang mga anak sa singot kon magdumili sa pagluka sa gamot nga hinungdan sa ilang kainutil pagkab-ot sa makiangayong suholan sa niaging 24 na ka tuig. Angayng maghiusa paggamit sa kinatibuk-an nilang puwersa pagpugos sa Kongreso pagtuman sa orihinal nilang tahas pagduma sa suholan sa mga mamumuo.

Kon mahibalik sa Kongreso ang gahom pagsubli ug pag-umol og mga lagda sa suholan, mas kusog nang magkahiusang tingog sa mga mamumuo. Kay lahi sa mga sakop sa RTWPBs nga pulos tinudlo sa Malakanyang, pinili ang mga sakop sa Kongreso. Managana paglikoy kay mahimong mataktak sa sunod nga piniliay.

***

Email: [email protected].