Naayo sa sardinas
Akong gugma sa sardinas nilungtad na og daghan uyamot nga katuigan. Sa gamay pa kong bata hangtod karon nga nagkalainlaing sakit nag-iyahay og pahinumdom sa kahinog na sa akong pangedaron, nagpabilin ang sardinas nga usa sa labing kinaham nakong sud-an. Pipila ka putahe naapil lang sa listahan sa akong mga kinaham tungod sa ilang koneksiyon sa sardinas.
Pananglitan, labing lamian ang inun-onan kon motuhop na sa kinatibuk-an sa isda ang timpla sa asin, suka ug ahos -- kanang mora na gyong sardinas. Di kong kabalibad sa miswa ug udong kay sardinas ang kasagarang subak. Ganahan ko sa tamatis nga prituhon o bisan sa iyang duga. Gawas nga anti-oxidant, maoy labing lami nga lamas sa sardinas.
***
Namenosan ang problema ug nahimong mas yano ang akong kalibotan tungod sa sardinas. Kon mahutdan og sud-an ang among canteen sa ABS-CBN, masulbad ang labihan nga kagutom pinaagi sa sardinas, lab-as gikan sa lata kay may mapasmo na kon prituhon o initon pa.
Sa mga higayon nga kinahanglan siya nga magluto, magsige og pangutana ang akong asawa unsay ganahan nakong kan-on. Bisan nahibawo na unsay akong tubag. Kay siya may doktora di kong kalalis sa iyang pasidaan nga di makaayo nga kanunayon ang sardinas. Nabalaka ko nga hagbay ra siyang nagduda nga may mag-piyesta og sardinas kon mao rang usa ang mahibilin sa bay.
***
Apan di ko ganahan og bisan unsa lang nga sardinas. Labing lamian alang nako ang baratuhon nga mga sardinas. Di ko ganahan og binotelya nga sardinas. Kuwang sa lami ang mga sardinas nga gipasawom sa mahalon nga olive oil. Mora kong ibayaw sa langit kon magdimdim na sa sardinas nga natumog sa tomato sauce.
Kay di man mahitabong palitan ko sa akong asawa sa akong kinaham nga sardinas, gihilom nako og sabot ang among katabang nga pakapinan og palit sa labing baratuhong sardinas ug itago lang aron di makit-an. Apan kinahanglang tultolan ko niya sa tagoanan.
***
Sa akong pagkasakit karong bag-o tungod sa sinusitis nagsige ko og suka tungod sa grabeng labad sa ulo. Nga nisangpot sa dehydration ug mas grabeng labad. Nawa ang akong gana sa kaon tungod sa kahadlok nga isuka lang gihapon.
Nasulbad ang akong dehydration pinaagi sa dextrose ug pagsige og inom og tagsa ka lad-ok nga tubig. Naulian na tingaling akong lawas kay nananghid na mang akong asawa nga biyaan ko kadiyot kay duna siyay lakaw. Hinaot nga wa siyang kabati sa kadako sa akong tingog sa kahinangop nga ako rang usa ang mabiyaan sa panihapon.
Ato ning klaruhon. Nakaseguro kong ang pag-atiman sa akong asawa ug ni Dr. Celine Aquino nakatabang. Apan ang pagkahurot sa usa ka latang sardinas maoy hingpit nga nakapaayo nako.
***
Email: [email protected]
- Latest
