Pagbangon sa Sugbo

Gipaabot nga kon mahinayon ang gipahibawo nga posibleng pagduaw ni Pope Francis sa mga dapit nga labing naggusbat sa bagyong Yolanda madapit ang kalibotanong atensiyon nga wa pa hingpit makabarug pagbalik ang mga biktima sa katalagman ug nagkinahanglan pa og dugang tabang--ning higayona sa pagtukod sa ilang mga pinuy-anan ug pagbanhaw sa ilang mga panginabuhi.

Way petsa nga gihisgutan ang Vatican. Nga maoy nipahibawo sa subli-subli nga panghinaot sa Santo Papa nga makapangunay siya pagduaw ug pakig-uban sa mga biktima sa usa sa labing bangis nga katalagman sa bag-ong panahon. Himuon ba sa di pa, o i-atol na lang sa iyang pagtambong sa International Eucharistic Congress nga himuon sa Sugbo unya sa Enero 2016?

***

Angayng pasidunggan ang ubang kanasuran ug lokal ug langyaw nga pribadong kahugpongan nga wa pa motalikod sa Bohol, amihanang Sugbo ug silangang Kabisay-an nga naigo sa nagsunudsunod nga linog niadtong Oktubre ug ni Yolanda niadtong Nobyembre sa niaging tuig. Kinakusganong pakpak alang sa mga buhatan sa gobyerno nga padayong nitabang sa mga biktima bisan sa sibaw nga mga pagsaway sa mga tawo nga way laing lingaw.

Hinaot nga manakod ang ilang kamatinabangon. Ug madasig ang uban pang kanasuran ug kahugpongan sa pag-abag sa mas kuti ug mas lisod nga tahas sa rehabilitation.

***

Bisan di takos mangahas mi sa ABS-CBN Cebu sa pagtampo sa rehabilitation sa amihanang Sugbo. Naggusbat nga classrooms sa Daanbantayan, nga maoy gikusukuso sa labing bangis nga hangin ni Yolanda, ang suwayan namo og ayo atol sa lapad nga Kapamilya Caravan tibuok adlaw karong Pebrero 15, adlawng Sabado.

Padayon ming nangayo og hinabang nga mga sin, mga kahoy, mga lansang ug ubang sangkap sa konstruksiyon alang sa mga tinun-an nga padayong nag-antos pagtambong sa klase sa mga tolda. Gidapit namo ang mga panday, mga inhinyero ug ubang mga boluntaryo nga makatabang sa pagpabarug o pag-ayo sa naggusbat nga mga eskuylahan.

***

Usa ka adlaw sa di pang caravan, pasidunggan namo ang tanang nakatabang --donors ug mga boluntaryo-- sa Kapamilya Relief Campaign alang sa mga biktima sa linog sa Bohol ug sa bagyo sa Sugbo ug silangang Kabisay-an.

Manghuwam mi og pila ka oras sa Valentine's dates sa matinabangon nga mga Sugbuanon aron nga magkatapok ta sa ABS-CBN Regional Broadcast Complex sa Jagobiao, Mandaue City, sa hapon sa Pebrero 14. Ang gatosan ka donors ug mga boluntaryo among palihugon sa pagtamla sa ilang mga timaan sa pagtabang sa mga biktima ug pagpabarug sa mga dapit nga napukan sa katalagman.

Palihug pagbawon og pagkaon nga idungan nato og hukad. Manghangyo sab mi sa mga may sakyanan sa pagkuyog sa caravan nga mogikan sa ABS-CBN Complex sa alas-5 sa kaadlawon karong Pebrero 15 aron sayong moabot sa Daanbantayan.

***

Email: [email protected].