Pagkabanhaw ug pagdaog

Pila ka oras human gideklarar nga kampeyon ang Lumad Basakanon sa Free Interpretation category sa Sinulog 2014 Grand Parade, nakadawat og tawag si Basak San Nicolas Captain George Rama gikan sa tagduma sa higanteng kompaniya sa barko. Nga nitanyag nga maoy moabaga sa kabahin sa gasto sa ilang pag-apil sa Sinulog sa sunod tuig.

Nisaad si Rama, ang haring gangis sa usa sa labing mabulukon ug taas og lahutay nga pundok sa kapin sa tulo na ka dekada nga tinuig nga panagtigi sa sayaw sa kadalanan, nga ilang timbang-timbangon ang tabang. Ang wa niya isulti mao nga masaligon siyang makadawat sila og mas maayong tanyag.

***

Di to maoy kataposang tawag nga madawat ni Rama. Daghang mas dagkong kompaniya ang gipaabot nga mohimo og mas madanihong tanyag aron lang mahilambigit sa usa sa labing talagsaong sugilanon sa pagbalik ug pagpanghawod sa Sinulog.

Lahi ang kahimtang usa ka tuig ang nilabay: Lumad Basakanon nga way daog sud na sa pila ka tuig naglisod pagpangita og pundo sa ilang pag-apil sa nasudnong bangga sa sayaw sa kaulohan; gawas nga wa hatagi og bisan usa ka dako sa Cebu City Council gitalikdan pa gyod sa pribadong mga kompaniya nga nipasalig na unta pagtabang nila. Nagduda si Rama nga ilang mga kaatbang sa politika ang nisabotahe nila.

***

Salamat sa katam-is sa kadaogan si Rama wa magpaundayon sa pagdumot. Wa siya mohingan og mga ngan ug nilantaw sa umaabot nga mabungahong mga paningkamot sa iyang pinangga nga mga mananayaw pag-angkon og dugang kadungganan alang sa Sugbo ug mga Sugbuanon.

Mga nasuhito sa ig-agaw ni Cebu City Mayor Mike Rama moingon nga mapasayluon na kaayo siya nga igo lang nipapingis sa choreographers ug mga pangu sa ubang dancing contingents nga kuwang na lang og diyutay nga modeklarar nga lansangan na nilang lungon sa Lumad Basakanon pinaagi sa mas maayo nilang mga sayaw ug mas makapaukyab nilang props.

***

Kinatam-isan sa pagbalik pagdaog sa Lumad Basakanon mao ang kamatinud-anon sa usag-usa nilang Rama ug sa managsuon ug orihinal niya nga choreographers nga silang Norman ug Randy Navarro. Human sa sunudsunod nilang kapildehan sayon ra untang Rama ang pagpaminaw sa mga intriga nga na-ughan nang managsuon og bag-ong mga ideya batok sa mas batan-on nilang mga kaatbang. Sama nga mahimo untang magpatental silang Norman ug Randy sa ubang dancing contingents nga nipasalig og mas dagkong bayad.

Inay mag-iyahay gipalig-on ang ilang panaghiusa: Niggahin si Rama og P1 milyon sa pundo sa barangay aron di na magpakilimos ni bisan kinsa, nagtuon ang managsuon og bag-ong mga sayaw pagbalaan ni Senyor Sto. Niño, gitak-opang ensayo sa gatosan nila ka dancers ug gipakuratan ang tanang nituo sa ahat nilang pagtaliwan.

***

Email: [email protected]