Mayor Mike, tagda daan ni

Dili g'yud kita angay nga maguol kun pamenosan ang gidaghanon sa mga bleachers nga ipahimutang daplin sa karsada nga agian sa Sinulog Grand Parade nga kalingkoran sa mga tawo nga motan-aw sa pasundayag.

Ang tinuod, dili magamit ang mao nga mga bleachers alang sa "General Public" tungod kay ang mao nga mga lingkoranan nga tuyoon sa pagtukod sa mga sakop sa Cebu Contractors Association para lang sa ilang mga suod nga higala.

Ang mga kontraktor nga motukod sa mao nga mga bleachers maayo kaayo nga moyawyaw atul sa press conference sa City Hall nga ang bleachers nga ilang tukoron para sa publiko ug tabang kini sa dakbayan sa Sugbo.

Pagkahilas paminawon! Siyaro usab og si Mayor Michael Rama wala makabantay niining mao nga sitwasyon nga abtik man kaayo ni siya'g mata. Ang iyang mga sinaligan nga sakop sa Sinulog Task Force wala ba 'sab makabantay?

Kun kamong tanang taga City Hall wala makabantay niini nga gibinuangan ra kamo sa mga kontraktor, mas maayo pa'g mangatulog na lang mo ug dili kay magpalunga-lunga pag-angkon nga sakop sa Task Force apan walay mahimo.

Karon na nga Enero 19 ang Sinulog Grand Parade ug maayo unta kun ang bag-ong city administrator nga si Engr. Eugene Elizalde makatigum sa mga kontraktor ug mahatagan niya kini og abiso.

Ang sagad magtukod og bleachers diha tupad nianang banko sa General Maxilom Avenue, kanang eskena paingon sa simbahan sa  Redemptorist, ang mga pasak-on sa bleachers mga higala sa tag-iya sa usa ka cement factory sa Naga.

Ang didto dapit sa Mango Square, duha ka bleachers ang gitukod sa miaging Sinulog apan ang pasak-on mga higala ra 'sab sa usa ka kontraktor. Palihug Mayor Mike, atimana kini nga isyu.

Pagkalaw-ay nga maayo kaayo kita nga mopahibalo nga ang mga bleachers alang sa publiko apan kun dunay gusto nga mosaka, dili pasak-on sa gwardya kay pangitaan nila og tiket nga may pirma sa kontraktor.

Ang uban mohimo'g rason nga gituyo kuno nila ang pagkontrolar sa gidaghanon sa mga tawo aron malikayan nga mahugno ang bleacher. Kon kini pa ang rason nganong bisan og wala pay tawo nga nanungtong sa bleacher, dili man gihapon pasak-an sa general public ang bleachers?

Dili hinoon tanan nga kontraktor ang naghimo niini kay ang mga bleachers nga gitukod diha sa Imus Road sa nanglabay'ng Sinulog, pasak-an man bisan kinsa. Bi, atong panid-an kon unsay aksyon niini ni Mayor Rama.

* * *

Awhag diay nako sa katawhan nga mas labing maayo nga mosayo kamo pagduaw sa Basilica del Santo Niño mentras dili pa kaayo daghan ang mga manimbahay og molinya aron moyukbo ni Santo Niño.

Ako hinoon, wala na'y problema kay duna na ko'y nindot kaayo nga cute gold-plated image ni Santo Niño nga hinatag sa akong amigo nga si Samson Dasoc. Kanunay kini nga anaa sa akong bulsa, bisan og anaa ko sa balay.

Swerte kaayo ko sukad nga kining mao nga imahen akong nahuptan. Dili lang ko mosulti kon giunsa nga naswerte ko. Basta kay gilikay ko niya sa mga kakuyaw og kon adunay mga butang nga angay na unta ko masuko, mokalma ko og mohikap na lang sa imahen sa akong bulsa.

Sunda ko ninyo. Apan nindot kaayo kining mao nga imahen nga gihatag kanako. Kon adto na kamo moduaw sa simbahan sa duol na ang Enero 19, pwerteng daghana na g'yud sa mga tawo unya dili pa raba pasudlan ang entero simbahan.

Ang linyahanan sa mga mohawok ni Senyor Santo Niño sigurado ko nga taas na kaayo unya. Busa ayaw na kamo pagpauwahi. Duawa daan ninyo ang imahen sa akong higala og manluluwas sa akong kinabuhi dihang naaksidente ko kaniadtong Hulyo 25, 1995.

Kon wala pa ang higala ko nga si Santo Niño, patay na unta ko kay naligsan man g'yud ko sa pangunahang ligid sa prime mover nga nagguroy og trailer. Sayonan ka ana? Apan kay devotee man ko ni Santo Niño, iya ko nga giluwas.