Way gugma sa kabos

Niay dakong balikas. Way bisan usa ka sakop sa grupo sa mga tagduma sa mga pantalan ug tugpahanan sa Sugbo nga nagrepresentar sa mga pasahero. Nga maoy labing dakong sektor kansang mga interes angayng iapil sa bisan unsang pagtuki sa mga lagda sa pagpahapsay sa inadlawng kalihokan sa duha ka higanteng ganghaan sa Sugbo.

Ilailaha ra gud kinsay mga representante sa pribadong sektor nga nakalingkod sa boards sa Cebu Port Authority nga maoy nagduma sa atong mga pantalan ug sa Mactan Cebu International Airport Authority nga maoy nagduma sa atong tugpahanan. Hapit tanan dagkong negosyante nga dunay ilang kaugalingong mga sakyanan. Way bisan usa nga kinahanglan pang mag-atang og sakyanang pamasahero ining kanaog gikan sa barko o ayroplano.

***

Usa sa labing bug-at nga silot nga ikapahamtang ngadto sa mga pasahero mao ang paglisudlisod nila sa transportasyon. Pait nang daan kon maapiki ang mga sakyanang pamasahero tungod sa pagkabara sa trapiko. Nga mahitabo sa atong mga pantalan ug tugpahanan hapit matag adlaw labi na sa panahong tingpauli.

Mas sakit pa gyod kon ang pagkatanggong sa mga pasahero wa kinahanglana ug kamenosan kon di man hingpit kalikayan pinaagi sa pag-umol og makiangayong mga lagda. Nga mahitabo lang kon ang mga tagduma may gamay lang untang pagpakabana sa kahimtang sa kinabag-an sa mga nigamit ug maoy tinuod nga nagbuhi sa mga pantalan ug tugpahanan.

***

Lisod kaayong sabton nganong hangtod karon, human sa daghan na uyamot nga katuigan sa pagtiyabaw sa mga pasahero, nagpadayon man gihapon ang linubagay sa taxi atubangan sa mga polis ug mga guwardiya sa pantalan. Nganong gitugotan man ni sa CPA board? Napiskan ba sila sa panguwarta nga klarong naglambigit sa mga tigbantay sa pantalan?

Nganong di man makiglambigit ang CPA sa mga kompaniya sa taxi o magdugang og shuttle buses aron di malawog sa mga tulisan ang mga pasaherong nagbaguod sa ilang bagahe nga mapugos pag-atang og kasakyan sa ngiob nga kadalanan sa gawas sa pantalan?

***

Papating ra gyod ang posibleng hinungdan nganong gipadayon sa MCIAA ang binuang nga lagda nga inay buwagon ang arrival ug departure areas giipon na hinuon ang mga pasahero nga nangabot na ug mogikan pa. Ambot unsay atraso sa kabos nga mga pasahero ngadto sa mga sakop sa MCIAA board nga mao may gilisudlisod pag-ayo.

Gipaboran nang daan ang adunahang mga pasahero kay pribadong mga sakyanan ug yellow cabs ray gitugotan nga makakanaog sa arrival area. Apan gitiwasang mga pasahero nga di kaabot sa mas taas nga plitehan pinaagi sa pagpalibutlibot nila uban sa bug-at nga mga bagahe hangtod nga mosagol na sa mga pasahero sa departure area diin didto ra gipapaabot ang kasarangang mga taxi.

***

Email: [email protected].