Mas tawhanong kapuy-an

Samtang di kapili ang mga biktima sa bagyong Yolanda asa sila ipahimutang sa Dakbayan sa Sugbo samtang magpaabot kanus-a makabalik sa silangang Kabisay-an o makabalhin og bag-ong mga pinuy-anan, di sab sila mapugos sa pagpuyo sa tent city nga gitukod sa Philippine Red Cross sa luna sa South Road Properties nga gipahuwaman ni Cebu City Mayor Mike Rama.

Kon mobalibad ang mga biktima pagbalhin sa tent city di sila kapasanginlan nga naghilas-hilas. Kay silang Rama ug PRC Chairman Dick Gordon nga maoy nagsabot pagtukod sa temporaryong pinuy-anan, samtang angayng pasidunggan sa dakong tabang, klarong wa magtagad pagsusi unsay masinati sa mga biktima sud sa mga tolda nga way salimbong sa adlaw ug way makasud nga hangin.

***

Dihang unang nakadungog sa reklamo sa pipila ka mga biktima sa kalayo ug kainit sa tent city sa niaging semana, abi nako nga naanad lang sila sa kahamaguway sa transient centers sa mga dakbayan sa Sugbo ug Lapu-Lapu nga unang nadangpan human nibiya sa Tacloban ug kasilinganang kalungsoran. Nga nahigam lang sa kaabunda sa mga hinabang gikan sa nagpakabana nga kahugpongan.

Apan dihang nisud ko sa mga tolda sa pila lang ka gutlo, haskang alimuota, nabatyagang naglibutlibot ang init nakong ginhawa, mora gyong hurnohan, naglapotay ang akong singot. Maong makasabot ko sa kabalaka sa mga biktima nga mahimong makaagwantang mga dagko apan unsa intawoy dangatan sa gagmayng mga bata ug masakitong mga hamtong?

***

Samtang nagdiskurso si Mayor Rama sa pormal nga pag-abli sa tent city niadtong Biyernes, nagkomedyahay ang pipila ka biktima nga makalikay sila sa grabeng kainit sa mga tolda kon tugotan sila nga makasuroy sa shopping malls. Apan nahadlok sang mosamot lang ang ilang kaguol kon makakita sa mga palitunon sa Pasko nga di nila maabot.

Gawas pa, lahi sa transient centers nga duol ra sa mga tindahan ug mga simbahan, gawas nga labihang layoa sa tent city wa pa gyoy mga sakyanang pamasahero nga ilang mapara. Gipasaligan hinuon sila nga destinohan og multicab sa City Hall ug ambulansiya sa PRC.

***

Nabalaka sa kahimtang sa mga mamuyo sa tent city ang kadagkoan sa Department of Social Welfare and Development. Apan di silang kapangisog kay wa man manag-iya og alternatibong luna nga ilang ikatanyag. Kutob ra sila sa panghinaot nga paningkamotan sa PRC ug City Hall nga tawhanon ang kahimtang sa mga biktima.

Alang sa kadagkoan sa PRC ug City Hall wa sila magkuwang. Nipasalig ang PRC nga pangitaan og alibyo ang kainit nga gireklamohan sa mga biktima. Si SRP Manager Bu Varquez niingon nga mahimong palibotan nila og kanal, butangan og buwag nga kusina ug dugangan og mga suga ang matag tolda alang sa dugang kasayon sa mga biktima.

***

Email: [email protected].