Palusot ang ilang salida

Di angay’ng basulon ang Commission on Elections sa kainutil pagpatuman sa lagda pagsumiter sa State of Contributions and Expenditures (SOCE) sa mga nanagan sa piniliay. Ang Kongreso kansang pipila ka sakop maoy nag-una sa listahan sa mga nakalapas maoy nagtangtang sa silot nga pagkapriso sa mga napakyas pagsumiter og SOCE.

Wa kong kasabot nganong gisaway sa naigo nga mga politiko ang pagbisto ni Comelec Chairman Sixto Brillantes Jr. sa listahan sa mga nakalapas sa lagda. Unsa man diay ilang gusto--hilumon lang sa Comelec ang ilang kalapasan? Bisan ang pag-awhag ni Brillantes nila pagkanaog sa katungdanan ilang giinitan. Mao ba diay ilang gusto nga hapuhapon lang ni Brillantes ang gahi ug niburot na nilang mga ulo?

***

Tinuod inutil ang Comelec sa pagsilot sa mga kongresista, mga gobernador, mga mayor ug mga konsehal nga napakyas pagsumiter sa tukma nga SOCE sa gitakdang panahon:

• Salamat sa liderato sa House of Representatives nga sama sa naandan gusto lang lingiwan ang kalapasan sa mga kongresista;

• Salamat nilang Interior Secretary Mar Roxas ug Justice Secretary Leila De Lima nga nipalabi sa technicality kay sa pagpatigbabaw sa diwa sa balaod nga kinahanglang patubagon ang mga politiko sa ilang pagbugalbugal sa mga lagda sa piniliay; ug

• Sa kapating sa mga politiko nga kumbinsido nga lahi sa kasarangang mga molupyo di sila madutlan sa balaod.

***

Abunda gyod hinuon ang sukaranan sa 422 ka mga opisyal nga nasakpan sa Comelec nga wa kasumiter og SOCE pagpikat nilang Brillantes ug sa Comelec:

• Way gahom ang Comelec pagpapakanaog nila sa katungdanan, bisan unsaon og pangisog ni Brillantes kutob ra siya sa pag-awhag ug busa mahimong bungul-bungolan; ug

• Salamat sa palusot nga giandam nang daan sa mga sakop sa Kongreso nga gidominahan sa kukhan nga mga politiko, makahimo ang mga malapason pagsumiter sa tukma nga porma sa SOCE nga ila nang pirmahan subay sa gimbut-an sa resolusyon sa Comelec ug wa nay makatandog sa ilang pangatungdanan.

***

Mao ni nakapait sa atong sistema. Ang gagmayng mga magbubuhis nga maoy labing daghan ug busa maoy tinuod nga bosing sa mga naghupot sa mga buhatan sa gobyerno--gikan sa labing ubos ngadto sa labing taas--dali ra kaayong pahamtangan sa kinatibuk-ang puwersa sa balaod, usahay pakapinan pa. Apan ang ilang mga sinuholan tungod lang kay maoy nagtungkawo sa gahom lisod kaayong madutlan.

Mao ni hinungdan nga ang mga nakakuot og P100 gikan sa pribadong pitaka hagbay rang nagtingkagol sa prisohan. Apan ang mga nangawkaw og minilyon ka pesos sa panudlanan sa katawhan nagpabiling gawasnon, wa pa gani makasohi ang kasagaran.

Kon wa pa kang kabantay, mao ni balaod ni Sabas: Ang langaw ray masangit apan ang kabaw molusot.

***

Email: [email protected].