Tax collectors fight g'yud!

Ang mga sakop sa Cebu City Council hayan nga modiskutir na ugma sa Annual Budget 2014 sa dakbayan sa Sugbo.

Wala gayud ko masayop sa akong gipahibalo kaniadto pa nga dili aprobahan ang kinatibuk-ang P10.4 bilyones nga budget nga gisugyot ni Mayor Michael Rama, kon dili kapin lang sa P5 bilyones ang ilang aprobahan.

Bisan og ugma pa ang sesyon apan nahibaw-an nako gikan ni Konsehal Margarita "Margot" Osmeña nga ang irekomendar sa Committee on Budget and Finance katunga ra sa gisugyot nga budget sa mayor.

Daghang mga konsehal miingon nga suportahan nila ang rekomendasyon sa mga sakop sa Committee on Budget and Finance kay dili man sigurado nga makabaligya og dakung kantidad sa yuta ang dakbayan sa Sugbo.

Nakasabot ko sa rason ngano nga dili aprobahan ang kinatibuk-ang budget nga gisugyot sa mayor tungod kay ang kantidad nga subra sa katunga sa iyang budget para sunod tuig anha man kuhaon kon makabaligya og yuta.

Husto ang argumento ni Konsehal Margot nga mahimong magsalig ang katawhan unya nga daghan sila og proyekto kon aprobahan ang kinatibuk-an nga budget apan dili diay matuman kon dili makolekta ang P10.4 bilyones.

Angay'ng masabtan sa katawhan nga dili tukma ang pamahayag sa uban nga moingon nga wala mapatuman ang daghang proyekto sa kagamhanan kay "wala aprobahi ang kinatibuk-an nga budget."

Bisan pa'g aprobahan ang kinatibuk-ang budget apan dili makolekta ang mao nga kantidad dili gihapon mapatuman ang gipangandoy nga proyekto nga anaa sa budget.

Ang budget naglambigit og duha ka "components" nga kini mao ang "sources of funds" ingon man ang "expenditures." Anaa sa budget gibatbat kon asa og kwarta ang kagamhanan nga magamit aron gastohon pagpatuman sa mga proyekto. 

Pananglit sa tuig 2013, gisugyot ni Mayor Rama nga P6.7 Bilyones ang budget apan giibanan kini sa City Council og gihimo nga P5.3 Bilyones kay nagduda ang mga konsehal nga dili makolekta ang kinatibuk-ang budget.

Wala sila masayop kay pagka karon kapin pa lang sa upat ka bilyon ka pesos ang nakolekta, apil na gani ang Internal Revenue Allotment.

Ang Local Finance Committee nga naglangkob sa City Treasurer, Budget ug Planning and Development Officers, miingon nga sa 2014 nagpaabot sila nga P4 bilyones lang gihapon ang buhis nga makolekta unya ang P6 bilyones kuhaon nila sa halin sa yuta.

Husto man ang gipasabot ni Konsehal Margot nga kon makabaligya og kayutaan ang administrasyon ni Mayor Rama mohimo na lang sila og Supplemental Budget.

* * *

Grabeha 'sab sa mga polis sa Naga City kay magsakay man g'yud og patrol car pag-adto sa balay sa giingong druglord sa Langtad nga gianggaan og "Toskig." Mauwaw 'sab tawon mo ana uy. 

Nakadawat ko'g report gikan sa akong informer sa Naga nga mitug-an niini. Gihatagan ko sa tinuod nga ngalan sa giingon nga drug pusher apan dili lang nato ibulgar.

Paita, gawas nga wala kamo makahimo'g aksyon anang maong giingong drug pusher magsakay pa g'yud mo'g patrol car pag-adto sa iyang balay. Daghan nga mga tawo nga naniid ra kaninyo.

* * *

Mingaw g'yud karong paskoha. Lahi sa miaging mga pasko nga mag-abot ang imbitasyon nga madawat namo nga mga sakop sa media. Karon, wala g'yud tawon.

Usbon nako ang pagpasalamat sa kadagkoan namo sa The Freeman/Philippine Star nga bisan og lisud karon ang panahon kay mitabang man sila pag-ayo sa mga biktima sa bagyo, apan mihimo gihapon sila'g party para kanamo ug gipadak-an ang among gift.

Nalooy na lang tawon ko sa among kaubanan, ilabi na ang mga babaye, kay naglisud pag-alsa sa dakung plastic box nga gisudlan sa daghang groceries.

Sa ngalan sa mga kawani sa The Freeman, magpasalamat kami ni Chairman Jose "Dodong" Gullas, Vice Chairman Johnvic Gullas, President and CEO Miguel Belmonte ug General Manager Bhoy Mendoza!