CITOM dili kaayo manakop

Daghang mga nagpahimulos sa higayon sa nahitabo nga bagyo. Ang mga magpapatigayon nga namaligya og bugas mipamahal pag-ayo sa presyo sa ilang baligya.

Ang presyo sa Ganador Rice kapin na sa P50 ang kilo samtang misaka usab pag-ayo ang kantidad sa ubang klase sa bugas nga dili kaayo maayo ang kalidad.

Klaro kaayo nga gipahimuslan sa mga magpapatigayon og bugas ang paspas nga pinalitay'g bugas kay gihatag sa mga dapit nga grabe nga gikuso-kuso sa bagyo'ng Yolanda.

Ang gihuna-huna niining maong mga tawo mao ra gayud ang pagpadatu sa ilang kaugalingon. Samtang ang ubang tawo mihatag og hinabang sa mga biktima sa bagyo, kining maong mga magpapatigayon nagpahimulos pag-ayo.

* * *

Sa wala pa magsugod ang misa kilid sa Magellan's Cross kaniadtong Domingo sa gabii isip kabahin sa nagsingabot nga 51st International Eucharistic Congress unya sa 2016 nga anhi himoa sa Sugbo, daghan ang nanghatag og hinabang-pagkaon para sa mga biktima sa bagyo nga Yolanda.

Ang mga donasyon nga naglakip sa mga delata nga pagkaon, mga noodles, mga used clothing ug bisan unsa nga hinabang, gikarga ngadto sa usa ka trak. Apan trak sa basura man diay sa Barangay Santo Niño ang gikargahan. Kahugaw sa maong sakyanan unya maoy inyong gikargahan?

Ayoha tawon ninyo kay maikog kita sa mga tawo nga hatagan sa maong mga pagkaon. Maayo lang sa mga canned goods apan kadtong uban nga pagkaon, sayon ra kaayo kamangan sa kagaw?

* * *

Dunay mireklamo kabahin sa mga polis nga magsakay g'yud og patrol car samtang mangayo og kwarta sa tigpasiugda sa tigbakay ug hantak diha sa Sitio Banika, Lahug. Uy asa ba kini dapit ang Sitio Banika?

Matud sa mireklamo nga gilaw-ayan g'yud sila nga magtan-aw nga ang mga polis dili lang modakup sa tigpasiugda ingon man sa mga tawo nga nagsugal kay hatagan man og kwarta sa nagpasiugda. Kada Dominggo g'yud kuno ni ang sugal.

* * *

May nangutana kon nganong dili man dakpon kining mga tawo nga magmaneho'g motor nga ang ilang ulo puston lang nila og panapton, lingiw-lingiwan ra man kuno sa mga sakop sa CITOM. Ang gipasabot nila mao kining mga Indian national.

Basta CITOM enforcer gani dili na lang ko motingog kay dugay ra kaayo ko nga nagreklamo nga daghan kanila mora'g inosente kon unsay balaud nga angay'ng ipatuman.

Apan tan-awa ang uban niining mga CITOM enforcers kon magbarug diha sa karsada, pina-bilangkad pa ug manighawak, pastilan kahambugero. Unya kon adunay mga dakponon bisan anha pa moagi sa ilang atubangan dili dakpon.

Mao kana ang rason nga minus og respito kaninyo ang mga drayber, dili mahadlok nga mohimo'g salaud kay dili man ninyo dakpon.

Bitaw, kining mga tawo nga dili magsul-ob og crash helmets ug puston ra nila ang ilang ulo ug tualya dakpon uy basta mataymingan sa mga agents sa Land Transportation Office.

Ang higala nako nga regional director sa National Commission on Filipino-Muslim mitataw g'yud nga dili "exempted" ang mga Muslim, apil ang Indians, sa pagsul-ob og helmet.

Labaw na kining usa ka "Budoy" nga dili usab magsul-ob og helmet ug puston ra niya ang iyang ulo og panapton. Dihay higayon nga wala g'yud ni mihunong dihang gipara atul sa LTO checkpoint. May adlaw ka ra nga madakpan, sir, sa imong pag-abuso.

* * *

Usa ka higala nako nga midaug pagka kapitan sa barangay mitug-an og anomaliya sa mga opisyal nga kang kansang termino kutob na lang karong Nobyiembre 30.

Gidoble hapit ang kantidad sa sakyanan nga ilang gipalit. Kining maong barangay, nakontrobersyal usab kaniadto tungod sa daghang binuang ug gani nag-atubang sila ug kaso sa Ombudsman.

Uy, lain na 'sab ni nga kiha unya Capt. Ang akong higala nakakuha og price quotation gikan sa mga kompaniya nga gipalitan sa maong sakyanan, barato ra man ang kantidad apan nganong mahal man ang pagpalit sa mga opisyal sa barangay?

Aron ba maapil ang komisyon?