Dili ba gud husto?

Dunay tinguha karon nga himoon na nga permanente nga dili paagian og mga sakyanan ang kabahin sa Osmeña Boulevard kilid sa Basilica del Santo Niño.

Matud ni Cebu City Vice Mayor Edgardo Labella nga gitoohan nga ang kanunay'ng pag-agi sa mga sakyanan kilid sa simbahan maoy nakapagabok sa kampanaryo sa simbahan.

Apan dili ko motoo nga ang kanunay'ng pag-agi sa mga sakyanan maoy nakapalumpag sa kampanaryo sa simbahan. Ang kakuwang og mga kabilya sa pagtukod sa kampanaryo maoy rason.

Kon ang kurog sa pag-agi-agi sa mga sakyanan makapaguba pa sa mga idipisyo nalumpag na unta ang karaan nga Gotiaoco Building sa Magallanes kay kusog pa gani ang dagan sa mga sakyanan.

Nalumpag ang kampanaryo sa Basilica atol sa linog nga mitay-og sa Sugbo ug Bohol kaniadtong Oktobre 15. Gitan-aw nako pag-ayo og ako nga nakita nga minus ra ang mga kabilya sa kampanaryo.

Ang simbahan gitukod 273 ka tuig na ang nakalabay kay nahuman ang pagtukod kaniadto na nga 1740.

Si Labella misugyot nga ang karsada tupad sa simbahan para na lang g'yud sa mga tawo nga manimba. Dili na paagion ang mga sakyanan.

Buyno, mas labing maayo tingali nga pagka karon pa lang daan pangitaan na og paagi nga dili mograbe ang traffic problem dihang dapita.

Gikan sa Plaza Independencia ang mga sakyanan nga mopaingon sa Colon maghuot sa dalan Legaspi ug sa Magallanes. Tungod niini kinahanglan nga ang daplin sa Legaspi dili na paparkingan og sakyanan.

Ang kilid sa dalan Legaspi tupad sa Cathedral ginegosyo sa dakbayan ug gihimong pay-parking area, samtang ang karsada atubangan sa Sto. Niño Barangay Hall parkingan usab sa mga sakyanan sa barangay.

Gawas pa niana dunay mga tindahan nga milapas na sa gutter ug nakapagamay sa karsada. Ambot nganong nahadlok man si Raquel Arce nga mohimo'g operation diha'ng dapita og igo ra man sa pasalig.

Angay nga hawanan ang Legaspi aron dili maghuot ang mga sakyanan dihang dapita unya destinohan og traffic enforcer ang eskena Legaspi ug P. Burgos. Matag agi nako diha kanunay'ng magpa-ugat ang mga drayber, ilabi na ang mga passenger jeepney.

Maayo unta kon tagdon kini sa bise mayor ang akong sugyot, ilabi na ni Mayor Michael Rama nga walay sipyat nga mobasa sa akong mga lindog.

* * *

Ang kanhi Citi-Center Commercial Complex diha sa Barangay Kamagayan dugay na kaayo nga naimbargo sa dakbayan sa Sugbo human ang tag-iya niini wala makabayad sa dako kaayong buhisanan.

Wala malilong sa mga opisyal sa dakbayan sa Sugbo nga dunay mga stalls diha sa kanhi wet market nga hangtod karon padayong nag-operate. Ang pangutana, hain man magbayad og abang kining maong mga negosyante?

Nganong wala man kini tagda sa mga opisyal sa dakbayan? Mosugot ra kamo nga ang property nga iya na sa dakbayan sa Sugbo unya gipangwarta sa laing tawo? Pagka wala gud ninyo'y pulos nga pagka opisyal!

Nagpabaya kamo sa inyong katungdanan kay imbis ang abang sa mao nga mga negosyante mapunta sa panudlanan sa dakbayan aron madugang-dugangan ang nihit kaayo nga koleksyon, inyo ra'ng gipasagdan.

Gawas sa mga nag-ukopar sa mga stalls, kining mga tawo nga anaa magpuyo ilawom sa inaptan nga merkado kaniadto nag-abang usab matag buwan ngadto sa usa ka tawo nga giila nga bagis-bagis diha sa Kamagayan.

Ayaw mo pagpabaya sa inyong katungdanan uy! Una nako nga hagiton si Mayor Rama nga iya kini dayon nga paaksyonan kay dugay na man siya nga nasayud nga dunay nangolekta og abang gikan sa mga nag-ukopar diha.

* * *

Pagkadaghang mga traffic enforcers nga anaa sa karsada nga gi-deputize sa Land Transportation Office apan mora'g wala masayud kon unsay balaod nga ilang ipatuman.

Daghan na kaayo ang mga sakyanan nga masugatan nako nga ang plate numbers gipangtapan og itom nga bildo nga dili na g'yud mabasa apan gipasagdan lang sa mga traffic enforcers.

Hangyoon nako si CITOM Chairman Ruben Almendras, CITOM executive officer Raffy Yap ug CITOM operations chief Joy Tumulak ingon man kamo nga naa sa ubang lugar, ipadakop ni's inyong mga sakop uy.

Wala ba sila kahibalo nga dakponon ni?