Angay pa ba sila nga sabton lang?

Kon ang mga biktima sa bagyo nga Yolanda didto sa Tacloban City nanglungkab na sa mga tindahan aron makakuha og pagkaon o kaha mga sapot nga ilang ikasul-ob, makasabot tingali kita kay ila man kini'ng gikinahanglan dayon.

Daghan sa mga taga Tacloban City nga naluwas man tuod dihang mikuso-kuso ang kusog kaayo nga bagyo inubanan sa pagtubo sa tubig-dagat nga milampurnas sa ilang lugar, apan wala na sila'y mga sinena ug pagkaon.

Napugos sila pagpanglungkab sa mga tindahan nga kakuhaan nila'g pagkaon kay ang atong kagamhanan wala dayon makaresponde sa paghatag kanila og tabang.

Apan kon ang gipanglungkab nila nga mga tindahan panguhaan pa gayud nila og mga appliances sama sa refrigerators, freezers ug uban nga dili makaon, maisip na kini nga pagpangawat ug salawayong na nga buhat.

Bisan og supak sa balaud ang gihimo sa mao nga mga tawo apan makasabot kita nga napugos sila paghimo niini aron makakaon ang nahabiling sakop sa ilang pamilya, apan dili kay apilon na lang 'sab sa paganguha ang mga appliances.

* * *

Labaw ra g'yud diay og usa ang gidaghanon sa mga kapitan dinhi sa dakbayan sa Sugbo nga kaalyado ni Mayor Michael Rama. Wala masayop ang mayor sa iyang pag-ihap-ihap human g'yud sa eleksyon sa barangay.

Kaniadtong Dominggo, 39 ka barangay kapitan ang didto manumpa atubangan nila ni Kongresista Raul V. Del Mar ug Rodrigo "Bebot" Abellanosa. Ang laing mga kapitan didto usab manumpa atubangan ni Mayor Michael Rama kagahapon.

Tan-aw nako ang Team Rama na maoy makakuha og presidente sa kahugpongan sa mga barangay kapitan kay sa ihap-ihap mas daghan ang mga kapitan nga alyado sa ilang grupo.

Ang gipilian sa Team Rama nga himoong ABC president naglakip ni Tinago Barangay Captain-Elect Joel Garganera, Philip Zafra sa Barangay Tisa ug Althea Lim sa Barangay Poblacion-Pardo.

Kanila'ng tulo pabor ko nga si Garganera maoy mahimong ABC president kay takus siya nga molingkud isip ex-officio member sa konseho sa dakbayan.

Kon madayon gani ni sa kataposan matuman na gayud ang dugay na kaayo'ng damgo ni Joel nga mahimo siya nga city councilor. Mora'g katulo ka higayon nga milansar siya pagka city councilor apan pilde.

Sila si Philip Zafra ug Althea Lim mga professionals 'sab apan mga linghod pa sila sa pangatungdanan sa barangay kon itandi sa tadhan na kaayo nga si Garganera.

Ambot kinsa usab kaha ang barangay kapitan nga ituboy sa Bando Osmeña Pundok-Kauswagan alang sa pagka ABC president. Sigurado na nga dili si T. Padilla Barangay Captain Michael Ralota kay konsehal na man lang siya sa barangay.

Buyno, kon kinsa man ang ituboy sa BOPK, kinahanglang mangampanya g'yud siya'g maayo kay alkanse na sila sa numero. Kinahanglan nga ang BOPK candidate pagka ABC president makakuha g'yud og botos sa mga kapitan nga alyado sa Team Rama.

* * *

Unsay epekto kon alyado sa Team Rama ang makalingkud diha sa konseho nga morepresentar sa mga opisyal sa barangay? Nagpasabot kini nga madugangan og usa ang upat karon ka konsehal nga alyado ni Mayor Rama.

Kay human sa Nobyiembre 30 wala na may ex-officio member nga representante sa Sanguniang Kabataan diha sa konseho, 17 na lang sila'ng mga konsehal. Sa 17 upat ang Team Rama ug mahimo na lang nga 13 ang BOPK.

Kon ibutang nato nga Team Rama ang kapitan nga mapili nga ABC president og molingkud isip ex-officio member sa konseho, lima na ang Team Rama diha sa City Council.

Mentras wala pay SK representantive nga molingkud diha sa konseho, 12 pa gihapon ang BOPK ug lima ang Team Rama. Sa laktud, alkanse gihapon ang Team Rama sa numero kon duna may mga botasyon sa paghukom og usa ka kontrobersyal nga isyu.

Importante kaayo kini ilabi na nga ang Cebu City Council magtuki karong mga adlawa sa gisugyot nga Annual Budget ni Mayor Rama.