Tabang sa mga biktima sa linog

Sa makausa pa, manuktok mi sa imong kasingkasing sa pagtabang sa mga biktima sa kusog nga linog nga nitay-og sa Sugbo, Bohol ug kasilinganang mga lalawigan sa Kabisay-an. Pagkaon ug tubig ang labing dinalian nilang panginahanglan. Gilusad dayon namo ang Kapamilya Relief Campaign alang sa mga biktima dihang nabantang ang lapad nga kadaot sa katalagman.

Dinalian ang panginahanglan sa hinabang. Busa palihug ihatod ang imong hinabang nga pagkaon, tambal ug tubig alang sa mga biktima sa evacuation centers nga nahadlok nga mamalik sa ilang mga pinuy-anan sa drop-off points sa Fuente Osmeña sa uptown area sa Dakbayan sa Sugbo ug sa ABS-CBN Broadcast Complex sa Jagobiao, Dakbayan sa Mandaue. Daghang salamat daan.

***

Nagsibya ko sa Arangkada sa DYAB dihang nagsugod ang linog sa alas-8:12 sa buntag. Nakighinabi ko sa kadagkoan sa Philippine Obstetrical and Gynecological Society nga nagsaulog sa World Menopausal Month sa tibuok Oktubre.

Naputol ang ilang pagpasabot sa mga timaan sa menopause sa kababayen-an tungod sa kusog nga pag-uyog sa among announcer's booth. Napintal sa ilang mga panagway ang labihang kabalaka unsay dangat namo sa sud dihang wa dayon mohunong ang pag-uyog. Naglabyug-labyog nang gibitay namong speaker ug niawop nang among mga suga. Maayo na lang nga wa sila managan. Kay di kong kaseguro makapugong ba sa pagsunod.

***

Giablihan dayon nakong website sa United States Geological Survey (USGS). Labing uwahi nilang nalista mao pa ang linog sa Greece. Dihang akong gi-refresh, napagawas na nila ang Magnitude 7.2 nga linog nga labing duol sa Carmen, Philippines.

Unsang Carmen ang ilang gipasabot? Wa katabang pagpatin-aw ang gilista sa USGS nga ikaduhang labing duol sa sentro sa linog nga Tabigin, Philippines. Maayo na lang nga ang ikatulo mao nang Tagbilaran, Philippines. Salamat sa USGS, mas una pang DYAB sa Philippine Institute of Volcanology and Seismology sa pagpahibawo sa gikusgon ug gilawumon sa linog duol sa Carmen, Bohol.

***

Naabtan og tunga sa oras si Phivolcs Director Renato Solidum sa pagpahibawo sa samang kasayuran nga mas unang nahatag sa website sa USGS. Nabahaw na hinuon kay giusab sa USGS ang coordinates sa epicenter sa linog nga nahimutang lima ka kilometro sa habagatan sa Balilihan. Dayon gipaubos sa USGS ang ilang banabana sa gikusgon sa linog ngadto sa Magnitude 7.1 ug gitultol ang mas tukmang nahimutangan sa sentro sa linog nga duha ka kilometro sa amihanan silangan sa Catigbian.

Nganong mas una ug mas tukma mang kasayuran sa wa nato bayring USGS kay sa atong gisuholang mga kawani sa Phivolcs? Bisan nangayo og pasaylo nga naapektahan ang ilang serbisyo sa shutddown sa federal government, nganong mas una mang USGS nga naka-mapa sa tanang mga dapit nga naigo sa unsang intensity sa linog?

***

Email: [email protected].