Mga kanding ni Jingjing

Gipanghimakak ni kanhi presidente Jingjing Faelnar sa Association of Barangay Councils sa Dakbayan sa Sugbo ang pasangil nga iyang gipa-encash ang pork barrel ni kanhi kongresista Antonio Cuenco niadtong 2006. Matod ni Faelnar ang kinatibuk-ang P14.7 milyones nga pork barrel ni Cuenco gibalhin sa Department of Agriculture ngadto sa panudlanan sa Barangay Guadalupe human napirmahan ang memorandum of agreement nga ang Guadalupe nay mopatuman sa kontrobersiyal nga proyekto ni Cuenco pagpamalit og seedlings ug mga kanding.

Niinsistir si Faelnar way napagawas nga bisan usa ka dako sa pork barrel nga wa moagi sa proseso sa subasta ug nga wa mahingpit ang mga dokumento sa pagbayad sa suppliers ug kontraktor.

***

Dihang nahinabi sa Tubag! sa ABS-CBN Cebu, si Faelnar subling nipasabot nga di angayng masuko si Cuenco sa iyang pagdumili pagpamalit og kanding. Gimahalan ra siya sa tag-P60,000 nga kanding kay ganahan siyang mas daghang mga barangay ang makapahimus.

Napakyas ang mga sakop sa Bids and Awards Committee sa Guadalupe pagpangita og mas baratong kanding. May nakasulti niya nga ang mas baratong mga kanding mapalit lang gikan sa Metro Manila. Kay hasol na man kon siya pay mamalit ug maghakot sa mga kanding, nakahukom si Faelnar sa pag-uli sa nahibiling kuwarta ngadto sa DA.

***

Mao ni kuwentada ni Faelnar sa iyang nagasto sa pork barrel ni Cuenco: P6.2 milyones alang sa seedlings; ug P664,654.91 alang sa goat house. P7.6 milyones ang balor sa tseke nga giuli ni Faelnar ngadto sa DA.

Pila ka tuig human nauli ang kuwarta, nisuway si Faelnar pagpangita og mas baratong mga kanding. Nakapalit siya og usa ka paresan nga tag-P17,000 rang usa. Nidaghan nang iyang mga kanding karon. Gi-anugnan si Faelnar nga wa mahingpit sa pagpatuman ang proyekto pagpamalit sa kanding. Apan niinsistir nga wa siyay nabolsa nga bisan usa ka dako gikan sa pork barrel.

***

Nagduda si Faelnar nga ang iyang tinguha pagdagan pagbalik pagka kapitan sa Guadalupe sa piniliay sunod buwan maoy hinungdan nga gibanhaw ang mga isyu batok niya. Gawas sa pork barrel ni Cuenco gibanhaw sang pasangil nga kakonsabo siya sa pribadong kontraktor nga gilambigit sa nabulilyaso nga mga proyekto sa nagkalainlaing mga barangay.

Wa mahadlok si Faelnar nga gipaluyohan sa gamhanan nga politikanhong mga pamilyang Cuenco ug Osmeña ang iyang kaatbang nga si incumbent Barangay Kapitan Michael Gacasan. Wa sab siya mahasol nga hangtod karon wa pay klarong deklarasyon si Cebu City Mayor Mike Rama pagpaluyo sa iyang kandidatura. Nabantang na hinuon ang kamasaligon ni Faelnar sa suporta sa mayor kay ang kolor sa iyang campaign shirts gisunod sa opisyal nga kolor sa Team Rama.

***

Email: [email protected]