Grand Halad sa Oktubre

Sa makausa pa, mangahas na sab mi pagpanuktok sa imong kasingkasing ug pagdapit nimo pagpakigsawo sa imong panahon, katakos ug katigayonan uban sa labing kabos, labing masakiton ug labing nagkinahanglan nga mga Sugbuanon. Imbitado ka sa pagtambong sa labing dakong piyesta sa libreng mga pangalagad, ang Grand Halad sa Kapamilya, nga himuon tibuok adlaw karong Oktubre 5, Sabado, sa Main Campus sa Cebu Technological University (CTU) sa M.J. Cuenco Ave. sa Dakbayan sa Sugbo.

Hinaot nga di nimo palabyon kining talagsaong kahigayonan nga mahimong kabahin sa higanteng pasundayag sa pagkuptanay, pagtinabangay, pag-inunongay ug panaghiusa sa mga nagkinahanglan og tabang ug sa mga may katakos ug kasingkasing sa pagtabang.

***

Tibuok buwan sa Septiyembre ming modawat sa itanyag nga mga hinabang atol sa Grand Halad sa Kapamilya. Unsa man ang kinakusgan nimong katakos o talento nga kapakisaw-an sa atong mga Kapamilya? Unsa man nga pangalagad nga gawas nga labing lunsay nga ikatanyag mao say labing makarepresentar sa imong kawsa o patigayon?

Way kabos nga di makatabang. Sama nga way adunahan nga wa magkinahanglan og tabang. Di kinahanglan nga minilyon ka pesos ang balor sa mga hinabang. Napamatud-an namo sa nangaging mga Halad nga ang mga tampo sa labing gagmay igo na o sobra pa gani sa kaliboan nga labing kabos sa atong mga dakbayan ug kalungsoran.

***

Labing gikinahanglan ang mga tambal sa mga pasyenteng bata ug dagko, daghan uyamot nga mga doktor ug nurses nga mohiling sa kahimtang sa ilang panglawas sa di pa hatagan og libreng mga tambal o libreng laboratory services, o libreng ibot sa ngipon. Gikinahanglan sab ang libreng mga antipara ug libreng paghiling sa mata sa mga maglisod na pagbasa.

Mahimo sang manghatag og libreng pagkaon--kan-on ug sud-an, o lugaw, o pan--libreng tubig, libreng kape, libreng gatas, libreng candies, libreng ice cream, libreng mga libro, libreng mga duwaan, libreng mga sinina, o mga gamit sa panimay nga wa na gamita apan kapuslan pa.

***

Apil sa labing tapokan matag Halad mao ang libre nga pag-ayo sa cellphones, personal computers, laptops, TV sets ug motorsiklo, libreng seminars ug livelihood skills trainings, libreng notaryo ug serbisyo sa mga abogado, one-stop-shop sa mga serbisyo sa mga buhatan sa gobyerno apil nang Visayas Ombudsman ug bisan libreng bakuna, kapon ug purga sa mga iro ug iring.

Kon wa pa kang kabantay among gipaningkamotan nga ikatanyag ang tanang libreng pangalagad atol sa matag Grand Halad sa Kapamilya, labi na karong Oktubre 5. Kon may mas bag-o ug mas mapuslanong libre ka nga ikahalad, palihug tawga ang DYAB sa 4221950, 4221953, 4221954 ug 4221956. Mahimo sang mo-text mo nako sa 09175903518, 09083997275 ug 09323817087. Daghang salamat daan.

***

E-mail: [email protected]