Maayong puhagon g’yud

Aron mabawi ang kwarta nga gihatag sa mga drayber og passenger jeepney ngadto sa mga dispatchers, ang ubang drayber dili na mosukli sa ta’g 50 sentimos ngadto sa ilang pasahero.

Gihimo kini sa ubay-ubay’ng mga PUJ driver ilabi na dihang ang minimum nga pletehan kaniadto ta’g P7.50 pa. Mohatag lang sila kon ang usa ka pasahero moinsistir nga mangayo sa sukli.

Ambot og tininuod ba kaha ang pagbutyag ni Mayor Michael Rama nga gusto g’yud niya nga mahunong na ang binuhatan sa mga dispatchers.

Ang tinuod, wala na kinahanglana kining maong mga dispatchers. Makamao man mobasa ang mga pasahero kon unsa nga PUJ ang ilang sakyan paingon sa lainlaing destinasyon.

Motoo ko sa giingon ni PO3 Edgar Baton, sakop sa Traffic Group, nga kining maong mga dispatchers maoy makamugna og traffic problem kay pahunongon man nila ang mga PUJ aron maghuwat og pasahero.

Kini ra ba’ng mga dispatchers masuko kon dili nimo hatagan og sensiyo. Sigi lang og kahiyos ang ligid sa sakyanan kon dili mohatag ang mga drayber sa maong mga tawo.

Mahadlok ang mga drayber kay sagad aning maong mga dispatcher gikan sa bilanggoan, ang uban daghang patik sa ilang kalawasan mao nga kurog ang mga drayber og mohatag na lang.

Dunay duha ka team sa Anti-Dispatching Team apan pastilan, matag team gilangkoban lang og usa ka polis ug usa ka civilian drayber. Unya dili pa pirmi ang ilang sakyanan nga magamit.

Bisan og gipadak-an ang multa sa madakpan nga dispatcher nga gihimo na nga P3,000 apan wala kini makapalisang sa maong mga tawo.

Kon pasakaan sila’g kaso buhian ra man kay ang kalapasan sa City Ordinance maisip man nga “summary proceedings” mao nga kon sila mabuhian na, dili na motunga sa hukmanan aron pagtambong sa husay sa ilang kaso.

Anaa diha ang problema nga kon si Mayor Rama sensiro sa iyang tinguha nga putlon ang binuang niining mga dispatcher angay nga dugangan og mga sakop ang Anti-Dispatching Team, unya matag semana pasumitihon sila og “accomplishment report.”

Makasabut kita ngano nga ang mga drayber dili gayud moreklamo og moutong na lang sa pagtunol nila og “tong” sa mga dispatcher kay sa madunggaban sila o kanunay’ng mahiyosan sa ligid sa ilang sakyanan.

* * *

Nalipay ko nga adunay plano nga mokuha pagbalik og private towing company ang City Traffic Operations Management aron moabag pagsumpo sa nagkagrabe nga problema kabahin sa mga motorista nga magpataka lang og parking sa ilang sakyanan.

Angay lang g’yud nga himoan na og aksyon kining abusado nga mga motorista. Dili gayud tukma ang gihimo ni Mayor Rama nga gipahunong ang towing operation atul sa paglingkod na niya pagka mayor.

Alang sa mga opisyal sa City Hall, kon natan-aw ninyo nga nabentahaan ang dakbayan sa Sugbo sa pagbahinay sa koleksyon sa mga private towing company, himoi og kausaban apan dili kay hunongon.

Bisan og duna ko’y sakyanan apan dili ko gusto nga ang aseras parkingan na sa mga sakyanan. Tan-awa ra gud ang aseras sa V. Gullas Street gikan sa karaang USP paingon sa D. Jakosalem, ang mga sakyanan naa na sa agianan sa mga tawo.

Dili kay kana ra maoy nakahimo’g kalapasan, daghan pa kaayo. Basta kay samok na kaayo ang mga sakyanan nga anaa giparking sa agianan na unta sa mga tawo.

Nahinangop ko sa laraw sa CITOM-Executive Committee og malaumon nga unta ipatuman nila kini sa labing dali nga panahon.

* * *

Bisan og daghan na kaayo og mga garbage trucks ang dakbayan sa Sugbo apan makakita gihapon ko og mga nagliundok nga basura nga wala dayon mahakut.

Unsa na man ‘say rason kaha sa taga Department of Public Services. Sayonan ka nga 37 ka bag-o g’yud nga garbage trucks ang napalit sa dakbayan, ug duna pay kapin sa napulo nga mga daan, sa ato pa dul-an sa 50 ka garbage trucks.

Kana wala pa’y labot sa mga trak sa basura nga iya sa lainlaing barangay nga motabang ‘sab paghakut.