Sugbuanong consultant ni Napoles

Karong nabisto na nga si Cheryl Jimenea usa diay sa mga consultant ni Janet Lim-Napoles, mas napalig-on ang mga pasangil nga nahilambigit si Senador Jinggoy Estrada sa kontrobersiya sa pork barrel. Mas nakapahimutang ni sa pagduda sa pangangkon ni Estrada dihang niulbo ang eskandalo nga wa siya kaila ni Napoles.

Napanghimakak nang daan ang pag-distansiya ni Estrada kang Napoles dihang nanggawas ang mga hulagway nga labihang posing sa mga sakop sa pamilyang Napoles uban nilang Estrada ug Senador Bong Revilla. Karong nitumaw ang ngan ni Jimenea lisod nang tuohan nga aksidente lang ang panag-abot sa managhigalang senador ug sa mga Napoles.

***

Si Jimenea maoy kanhi sekretarya ni kanhi presidente Joseph Estrada sa Malakanyang. Dihang napalagpot sa gahom si Estrada, si Jimenea giingon nga nibalhin pagtrabaho sa anak nga senador. Ang igsuon ni Jimenea nga si Thelma Chiong nitug-an ni June Perez sa DYAB Radyo Patrol nga posibleng didto sa buhatan ni Senador Estrada nagkaila silang Napoles ug Jimenea.

Nipasabot si Chiong nga di kalikayan nga makaila gyong Jimenea ang mga bisita ni Estrada. Matod niya ang pagka-consultant ni Jimenea wa magpasabot nga suod silang Napoles o nga apil siya sa tanang mga transaksiyon sa pork barrel. Mahimong makatabang si Chiong sa kawsa sa iyang igsuon apan naapiki sa iyang pamahayag si Estrada.

***

Matod ni Chiong di magpa-interview si Jimenea mahitungod sa bag-ong nitumaw nga pasangil nga niapil siya pagsuburno sa pipila ka kawani ni Napoles aron nga iduot ang labing unang whistleblower nga si Benhur Luy. Nipasangil ang usa sa tulo ka saksi nga gipatawag ni Jimenea nga gihatagan sila og P20,000 matag usa uban ang tugon nga sultihan nila ang mga imbestigador sa National Bureau of Investigation (NBI) nga gihatag nilang Luy ang tanang nakolekta nga kuwarta.

Kon tuohan ang saksi di yano nga consultant ang papel ni Jimenea sa mga transaksiyon ni Napoles. Kay nanawag si Jimenea nila pila lang ka gutlo human nanawag si Napoles samtang didto pa sila sa Department of Justice (DOJ) pila ka takna sa wa pa motahan sa Malakanyang.

***

Kang Jimenea ang usa sa labing uwahing ngan nga nitumaw sa kontrobersiya sa pork barrel. Bag-ong nanggawas nga report sa Commission on Audit (COA) nihingan na nilang Senador Loren Legarda ug bisan ni kanhi senador, karon kalihim sa Department of Interior and Local Governments (DILG) nga si Mar Roxas ug ubang mga alyado ni Presidente Noynoy Aquino.

Masukod sa mosunod nga mga adlaw ang kamatinud-anon sa pasalig ni Aquino nga hukasan niya ang tanang nahilambigit nga eskandalo bisan unsay ilang bulok sa politika. Samang masukod sang katakos sa katawhan pagsusi unsay tukma nga kasayuran nga angayng tuohan ug unsay panglawgaw lang nga angayng ibasura.

***

Email:  [email protected].