Doling shirts

Di ko kinahanglan nga mobutang og bag-ong piyansa samtang mo-apelar atubangan sa Court of Appeals sa hukom ni RTC Judge Raphael Yrastorza Sr. pagkonbikto nako sa kasong libelo nga gipasaka ni kanhi gobernador Gwen Garcia unom ka tuig nang nilabay. Magpabilin kong gawasnon tungod sa P10,000 nga piyansa nga akong gihatag sa korte dihang gipadakop kong Yrastorza niadtong Agosto 27, 2010.

 Gawas pa, wa ko pahamtangi ni Yrastorza og silot nga pagkabilanggo. Gituman niyang kamandoan sa Korte Suprema nga multa ray silot samtang padayong gituki sa mga sakop sa Kongreso ang dugay nang nag-ung-ong nga sugyot pag-decriminalize na sa libelo.

-o0o-

Salamat sa pagsabot sa kadagkoan sa ABS-CBN Corp. ug sa The Freeman, magpadayon kong gawasnon nga moduma sa akong inadlaw nga mga sibya sa DYAB ug Channel 3 ug mosuwat sa inadlaw nga lindog sa Freeman ug Banat News. Bugtian nako ang ilang kaayo pinaagi sa matinud-anon nakong pagtuman sa akong trabaho sa kutob sa maabot sa akong yanong katakos.

Padayon kong motuki sa labing mahinungdanon nga mga panghitabo ug kontrobersiya, labi na sa paghubad sa ilang mga implikasyon ngadto sa kinabag-an sa katawhan. Mas kusganon nakong ibutyag ug batokan ang mga pangabuso ug kahiwian sa mga opisyal sa gobyerno ug pribadong sektor bisan unsa sila kagamhanan ug kamaginukdanon.

-o0o-

May mga sugyot nga magtigom sila og kuwarta aron ibayad sa multa nga gipahamtang sa korte. May mga nisugyot sab nga ilusad ang petisyon pag-recall ni Garcia pagka kongresista sa ikatulong distrito sa Sugbo. May mga nitanyag na og libreng printa sa "Doling Kawatan" t-shirts.

Nahinangop ko sa kainit sa pagpaluyo sa nagpakabana nga mga Sugbuanon ug kahugpongan pinaagi sa mga sibya sa radyo, mga sinuwat sa pamantalaan ug social media ug mga tawag ug text sa telepono. Mas makapadasig ni nako sa pagpadayon sa maisugon ug responsable nga pagpangita sa kamatuoran pagtuman sa pangandoy nga mahatag ang labing dakong kaayuhan ngadto sa labing daghan.

-o0o-

Hinaot nga makasabot ka nganong di ko kasugyot og bisan unsang kalihokan alang nako. Makasalig mo nako kon lain ang hingtungdan. Apan taas ang akong ikog kon personal na nakong interes ang hisgutan.

Apan may gamay lang kong hangyo. Hinaot nga kining nahitabo nako di makapaawong sa imong pagpakabana, di makapaluya sa imong pagpanginlabot ug di makapahugno sa imong paglaom nga bisan sa atong kakabos ug kagamay mahimo tang mangandoy sa mas sanag ug mas makinagayon nga ugma. Bisan unsa kabangis ug kamadaug-daugon ang mga nagtinguha pagpabilin sa naandan nga pagpanghawod ug pagpahimus.

Di ni mahitungod nako. O ni Garcia. Mahitungod ni sa pagtimbakuwas na sa katawhan pagkab-ot sa gihikaw ug gilugpitan nga kausaban kansang panahon niabot na.

[email protected].