Kuyaw sa disgrasya

Duna ba'y rainwater catchment ang duha ka building sa Cebu City Hall?

Kon pananglit wala dili ba kataw-anan nga ang dakbayan modemanda nga ang mga balay-patigayon magbutang og rainwater catchment kon pundohanan sa tubig-uwan unya ang City Hall wala?

Konsehal pa si Mayor Michael Rama ug usa gani siya sa mihimo sa City Ordinance 1711 kaniadtong 1998 apan kining maong balaod wala man hingpit nga gipatuman.

Ang karaang City Hall building gibag-o kaniadtong 2007 apan ambot og hain dapit gibutang ang rainwater catchment kon duna man. Gikuyawan ko nga basin og mahisama kaniadto nga ang City Hall building wala gani'y fire exit.

Kon kining maong ordinansa hingpit nga ipatuman makatabang kaayo kini nga dili kaayo makalunop, ug kon makalunop man, dili kaayo grabe.

Ako gani duna ko'y tulo ka baril nga pangsawod sa tubig-uwan ug kon ang uban duna 'sab, daghang tubig nga dili makaabot sa mga sapa o kaha makapalunop sa karsada.   

* * *

Mailhan g'yud nako kon kinsa sa mga department head sa Cebu City Hall ang nagtoon sa iyang leksyon. Ang “leksyon” nga akong gipasabot mao ang mga inpormasyon nga naglambigit sa gidumala niya nga department.

Sa mata'g press briefing nga ipahigayon sa mga department head sa City Hall, usa ko sa mga reporters nga mokuti-kuti g'yud pagpangutana aron makuha gayud ang inpormasyon nga akong gusto.

Dili nako tumong nga pakauwawan ang mga department head aron nga dili sila makatubag kay ang tinuod kon nagtoon lang sila sa ilang “leksyon” sigurado man sila nga makatubag sa tanang pangutana.

Apan pastilan, bisan sa pangutana kon pila kabuok ang mga kawani sa ilang departamento ug kon pila ang budget sa ilang sweldo sa usa ka tuig dili man makatubag.

Mentras may higayon pa, pagtoon mo sa inyong leksyon kay sigurado ra ba nga moatubang kamo sa City Council atol sa budget hearing nga magtuki sa gahin sa inyong mga department para sunod tuig.

* * *

Ngano gud tawon nga tukoran man og Day Care Center sa mga opisyal sa Ermita ang Warwick Barracks market? Husto ang gihimo ni Market Administrator Raquel Arce nga gisupak niya ang tinguha sa mga opisyal sa Ermita.

Naunsa mo? Merkado na ang maong lugar unya butangan ninyo og Day Care Center? Unya pagastohon pa gayud ninyo ang City Hall og mga tunga sa milyon ka pesos?

Pwerte na man gani nga pag-abuso sa mga tawo nga nagpuyo diha kay bisan og nasayud sila nga merkado na diha apan ilang gitukoran og mga balay.

Nindot kaayo ang imong gihimo Ma'am Raquel kay gipatigbabaw g'yud nimo ang husto nga desisyon. Kini's Raquel usa kini sa mga opisyal sa City Hall nga nagtrabaho g'yud.

* * *

Hangtod karon, ang kadagkoan sa CITOM wala pa makakita og paagi unsaon nila pagsulbad kining problema sa mga motorista nga gikan sa Sudlon Road (kana ba nga gikan sa Beverly Hills) ug gusto unta nga mopaingon sa Salinas Drive.

Gikan sa alas sayes ngadto sa alas nueve sa buntag gidili ang pag-left turn sa mga sakyanan paingon sa “JY Square” kon gikan ka sa Sitio Sudlon, apan asa man sila moliko?

Tuod, ang mga sakyanan, mga motor, mo-right turn apan adto sila sa unahan moliko balik sa agi paingon sa JY Square nga nakahatag na hinoon og kakuyaw nga maka-aksidente kay lisud man kaayo ang pagliko.

Nasabtan nako ang kabahin sa mga motorista. Asa man sila moliko nga wala may eskena nga makabalik sila? Dugay na nako kini nga gipadangat ang problema apan wala pa gihapon mapangitai og sulbad.

Kanus-a man ninyo kini atimanon? Unya na ba kon adunay aksidente nga mahitabo diha nga may mangamatay?  Para nako, kinahanglang abtik lang g'yud ang enforcer nga idestino diha, puli-pulihon lang gud.

Apan baya, usahay makit-an nako ang enforcer nga madestino diha luya kaayo, mora lang og kandela.