Pangaliya alang sa Simbahan

Pasaligan nakong mga pari nga naigo sa awhag ni Pope Francis nga di sila mamalit ni manakay og luhong mga sakyanan nga di kami maoy nagsumbong sa Vatican sa pag-insistir sa luho nilang lifestyle bisan sa pagmatuod sa Santo Papa nga bisan ang labing taas nga opisyal sa Simbahang Katoliko makapili sa pagpuyo og yanong kinabuhi.

Tingali sibaw lang gyud kaayo ang mga pagsaway batok sa kaparian sa Sugbo nga nagpapating pagsakay-sakay og BMW ug pagpadaylang sa labing lamian nga mga bisyo. O kay di man nila monopoliya ang kapritso mahimong managsama nga mga bagulbol ang nabatian sa Santo Papa gikan sa nagkalainlaing bahin sa kalibotan.

***

Di hinuon mahutdan ang mga pari og lusot sa awhag sa Santo Papa. Mahimong kopyahon ang sanglitanan sa ilang kadagkoan nga way kukauwaw nga nangayo og SUVs gikan sa Philippine Charity Sweepstakes Office (PCSO) bugti sa pagpakahilom sa Catholic Bishops Conference of the Philippines (CBCP) sa “Hello Garci” ug ubang mga eskandalo sa siyam ka tuig nga pamunoan ni kanhi presidente Gloria Arroyo.

Gawas nga di sila obligado nga motuman sa tambag ni Pope Francis. Way police power ang Vatican. Di mahimong posasan ang mga pari nga magpaugat paghimo nga palasyo sa ilang mga kumbento ginamit ang amot sa timawa nila nga mga parokyano.

***

Laing kinaham nga lusot sa kaparian nga nabutaan na sa ilang gugma sa materyal nga kabtangan mao nga igo lang nilang gidawat ang kamanggihatagon sa adunahan nilang mga parokyano. Angay silang magbantay. Kay samang lusot ang gigamit sa dakong opisyal sa Vatican Bank nga nagtingkagol na ron sa prisohan.

Si Msgr. Nunzio Scarano sa Vatican Bank niinsistir nga pulos donasyon ang mahalong kabalayan ug kabtangan nga nasakmit gikan niya sa kapolisan sa Italya. Nagduda ang mga imbestigador nganong inay pakisaw-an sa iyang mga parokyano gitumpi ni Scarano ang makalilisan nga katigayonan, nga ang pipila napamatud-an nga kinawat. Si Scarano gilambigit sa pagpayuhot og 20 milyones euros gikan sa Switzerland ngadto sa Italya sakay sa pribadong jet.

***

Kon basehan ang pagkuwestiyon sa pipila ka pari sa kausaban nga gipasiugdahan ni Pope Francis, di sayon ang iyang tahas sa pagbag-o sa simbahan. Apan ang gipakita niyang determinasyon paglimpiyo sa Vatican Bank ug ubang mga institusyon maayong timaan nga di pulos pagarpar lang ang iyang panumpa pagpaduol pagbalik sa Simbahang Katoliko ngadto sa katawhan.

Angayng ipangaliya nga hatagan og tukmang kalig-on sa panghunahuna ug kahimsog sa panglawas si Pope Francis paghaw-as sa simbahan gikan ning ngitngit nga bahin sa iyang kasaysayan. Hinaot lamdagan sang kaparian. Aron inay mobabag motabang pagpatuman sa makiangayong kausaban ug nga makaangkon og tinuorayng katagbawan sa pag-alagad sa labing nagkinahanglang mga parokyano di sa pagpaulipon sa kaluho.

***

Email: [email protected]