Taytayan sa nagbahang tabang

Ganahan ka bang motabang? Gusto ka bang makigsawo sa imong mga grasya uban sa mga mas nagkinahanglan? Duna ka bay katakos, panahon ug katigayonan nga kapahimuslan sa labing burong, labing huyang ug labing timawa? Nagdugo ba ang imong kasingkasing nga nagtan-aw sa kapait sa kahimtang sa labing tabanganan nga mga Sugbuanon apan wa lang kahibawo unsaon?

Wa ka mag-inusara. Daghan ang gustong motabang. Mas daghan ang andam nga makigsawo sa ilang nakat-onan, makig-uban sa mga naglibog ug nangasaag ug manghatag sa ilang mga gasa. Apan sama nimo naglisod sila unsaon pagsugod. Gawas nga nabalaka nga maabusohan nakumbinser nga nagbuntaog ang panginahanglan ug di mahitabong matabangan nila ang tanan.

***

Mangahas ko pagsuway pagtubag sa mga pangutana sa ibabaw: Ang Grand Halad sa Kapamilya (GHSK), ang labing dakong piyesta sa libreng mga pangalagad, maoy among kabos nga pagsuway pagtapak sa kang-a tali sa mga may katakos ug kasingkasing sa pagtabang ug sa mga labing nagkinahanglan og tabang.

Ang GHSK di mahitungod sa ABS-CBN ni sa iyang mga sibyaanan, ang DYAB AM ug DYLS FM. Ang tinuorayng bida mao ang katawhan ug mga institusyon sa gobyerno ug pribadong sektor nga nagtinabangay. Way bisan usa ka indibiduwal ni kahugpongan nga makaabaga sa minilyon ka pesos nga gasto sa matag GHSK.

***

Bugtong tampo sa ABS-CBN, nga nagsaulog sa iyang “Silveracion” sa ika-25 ka tuig nga pagsibya sa Sugbo, mao ang pagpamalit og mga tambal ug paggamit sa tanan niyang plataporma sa radyo ug telebisyon aron pagdasig sa panag-abot sa mga gustong motabang ug sa mga tabanganan.

Matag lusad namo sa GHSK, nga himuon kaduha matag tuig, takboyan mi sa samang kakuyaw nga wa nay mosanong sa among panawagan. Nga gipul-an nang mga Sugbuanon sa pagtinabangay. Nga mosumbalik sila pag-ingon namo nga kon maghilas-hilas mi og tabang angayng hakpon na lang namo ang tanan nga responsibilidad sa way paghasol sa ubang mga tawo ug kahugpongan.

***

Apan matag higayon makugang mi sa kainit, kalunsay ug kalapad sa pagtinabangay sa mga Sugbuanon. Kon way kinutoban ang kaliboan ug usa ka panginahanglan sa labing kabos, sa labing gipanggutom, sa labing dinaugdaog ug sa labing masakiton sa atong katilingban, labaw pa nga abunda ang pagbaha sa mga hinabang alang nila.

Nagsuwat ko ini aron sa makausa pa malipayon nga mopahibawo nimo nga ang GHSK nahimo na sab nga taytayan tali sa mga nagkinahanglan ug sa mga motabang. Sa laing talagsaon nga higayon, masaksihan na sab ang mabulukon ug makapatandog nga pasundayag sa pag-inunongay sa mga Sugboanon tibuok adlaw karong Sabado, Hulyo 6, sa Main Campus sa Cebu Technological University (CTU) sa M. J. Cuenco Avenue, duol sa pantalan ug Plaza Independencia sa Dakbayan sa Sugbo.

***

Email: [email protected]