Minosan ang pamolitika

Nindot kaayo ang wali ni Monsenyor Roberto “Boy” Alesna atol sa santos nga misa isip kabahin sa pagbukas sa inaugural session sa konseho kagahapon.

Giawhag niya ang mga opisyal sa dakbayan sa Sugbo nga moserbisyo gayud sa walay pagpinig kon kinsa ang ilang serbisyohan, ma dumadapig man sila sa ilang kaatbang sa miaging eleksyon.

Apan tan-aw nako, mahimong kon mopasalig man gani ang mga hingtungdan, anaa ra kana sa tumoy sa ilang dila.

Tan-awa bisan ug  gibalik-balik ni Mayor Michael Rama nga sa iyang administrasyon minosan ang pamolitika, apan tan-awa daghang mga kawani nga bisan og nagtrabaho sa tinarong wala man renyohi.

Ang uban girenyohan man tuod apan gihatagan lang og usa ngadto sa tulo ka buwan. Mora'g konsuylo lang ba mentras nangita pa sila og laing kapadulngan.

Ang lima ka tawo nga gitahasan ni Mayor Rama nga mohashas sa mga empleyado iya man nga mga sinaligan. Dili na lang nako ibutyag kon kinsa sila.

Tungod niana, ang mga opisyal nga alyado sa pikas grupo ang Bando Osmeña Pundok-Kauswagan (BOPK) mobawos g'yud. Tan-awa, ang duha ka konsehal nga alyado sa Team Rama -- Dave Tumulak ug Mary Ann delos Santos -- wala gayud hatagi og posisyon sa 24 ka komitiba sa Cebu City Council.

Arang-arang na lang hinoon kay si Konsehal James Cuenco gihatagan man og katungdanan nga mangulo sa committee on tourism unya si Konsehal Hanz Abella sakop sa committee on education.

Bisan og gipasabot ni Vice Mayor Edgar Labella nga ang reklamo ni Konsehal Delos Santos mahimo nga tukion nila sa regular session, apan nagtoo kaha mo nga modaug siya?

* * *

Ang gihimo ni Mayor Rama nga pagtangtang sa katungdanan niadtong mga mi “walk-out” sa gipatawag niya nga tigum kay wala mopasalig og political support kaniya, dili unta angay.

Nagpasabot kini nga madinumtanon si Mayor Rama. Pareho ni City Veterinarian Alice Utlang, maayo kaayo pagkadumala ni Dr. Utlang ang iyang departamento.

Nalimot ra tingali si Mayor Rama nga ang dakbayan sa Sugbo ug si Dr. Utlang mismo gipasidunggan sa Humane Society International didto sa Las Vegas, Nevada tungod sa maayong pag-atiman sa mga iro.

Si Fidel Magno, bisan og kuwang og budget ang Department of Manpower Development and Placement (DMDP) apan naninguha gihapon si Fidel nga makahimo og mga job fairs aron makatabang ang dakbayan sa mga nanginahanglan og trabaho.

Apan sila gitangtang sa katungdanan. Maayo unta og mokalma si Mayor Rama sa paggukod sa mga kawani abi kay tua sila sa pikas pundok misuporta.

* *  *

Gibatbat ni Mayor Rama sa iyang inaugural address nga ipatuman gayud niya atol sa tulo ka tuig niya nga termino hangtod sa 2016 ang paghawan sa “three meter easement” gikan sa tampi sa kasapaan.

Buyno, nindot kini nga proyekto ug ako maoy mouna sa pagpagakpak kon sugdan dayon kini niya pagpatuman. Nagkahulogan kini nga daghang kabalayan ang maguba kay libo-libo ka mga balay ang anaa gitukod daplin sa kasapaan.

Ang problema gud diha kay tungod sa pagkahakog sa ubang mga nagpuyo daplin sa kasapaan, gipalapdan nila ang ilang teritoryo pinaagi sa pagriprap sa sapa.

Resulta, migamay pag-ayo ang sapa nga dili na hapit makaagi ang tubig kon adunay kusog nga pagbunok sa uwan. Ang tinuod, malooy unta kita kon kining maong mga balay panggub-on, apan hain man ang palabihon, ang kalooy sa pipila ra og sa daghang mga tawo nga malunopan tungod sa kahakog og pwesto niining mga tawhana.