Dakong piyesta karong Hulyo

Sa makausa pa, himuon ang Grand Halad sa Kapamilya, ang labing dakong piyesta sa libreng mga pangalagad, karong Hulyo 6, Sabado, sa Main Campus sa Cebu Technological University (CTU) sa M. J. Cuenco Avenue sa Dakbayan sa Sugbo.

Sa makausa pa, mag-abot na sab ang mga Kapamilyang may katakos ug pagbati sa pagtabang ug mga Kapamilyang mas nagkinahanglan og tabang.

Ug sa makausa pa, manuktok na sab mi sa imong kasingkasing sa pagtampo sa imong katakos, katigayonan ug panahon. Aron atong matabangan ang labing iwit, labing gagmay ug labing napasagdan nga mga Sugbuanon ug mga molupyo sa kasilinganan nga mga lalawigan.

***

Mao pay pagsugod namo og panglista apan nagbaha nang mga tanyag sa tabang nga among nadawat. Labing una nga nitubag sa among pamarayeg atol sa Arangkada sa DYAB Abante Pa Bisaya! mao ang kadagkoan sa Philippine Dental Association Cebu Chapter. Nga mohimo og libreng ibot, pasta, limpiyo ug dental health seminar.

Ang Qualfon niboluntaryo sa ilang mga kawani nga nurses nga moabag sa libreng medical services. Nga magmalampuson lang kon daghan ang boluntaryo nga mga doktor, mga dentista ug mga espesyalista sa mata ug ubang bahin sa lawas. Ug mga tambalanan ug ubang pribado nga kahugpongan nga molahutay og panghatag og libreng laboratory services.

***

Labihang daghana nang nitanyag og libreng pagkaon: Init nga pagkaon alang sa unang 500 ka bata, mga mabdos ug nagpatutoy nga mga inahan gikan sa Feed the Children; usa ka sakong bugas humay, subak ug lamas alang sa lugaw sa mga bata ug dagko gikan ni Abeth Cuizon;

100 ka empanada gikan ni Inday Varing Nacario; 50 ka putos nga bam-i gikan sa Mabolo Bam-i House; Libreng Kopico coffee ug Energen cereals gikan sa Tridharma Marketing Corp.; pan gikan sa Kikoks ug Twinbee; pagkaon gikan ni Crescencia Rodriguez; ug binaril nga ice cream ug gatosan ka apa gikan nilang Minda Ocliasa, Gilee's Bakeshop, Rico Lucena, Vilma Andales ug Virgie Tabada.

***

Ang St. Joseph-San Roque Foot Reflexology Association nga gipangulohan ni Boy Canedo motanyag og libreng foot reflex. Mo-boluntaryo sang mga sakop sa Association of Concerned Texters (ACT) ug CARE 7 sa pagpahapsay sa linya sa kaliboan nga mopahimus sa libreng mga pangalagad. Libreng school supplies sa CARE 7 ug libreng lunch bags gikan ni Susan Duhig. May libre sab nga seminars ang Gestalt Wellness Institute ug Consumers Rights for Economic Welfare (CREW).

Sa mosunod nga duha ka semana, padayon ming modawat sa mga tanyag nga hinabang alang sa Grand Halad sa Kapamilya. Bisan unsay mahunahunaan nimong libre mahimong atong itanyag gikan sa alas-6 sa buntag hangtod sa alas-5 sa hapon karong Hulyo 6. Palihug i-text lang ko sa 0917-5903518. Daghang salamat daan.

***

Email: [email protected]