Bag-ong Firearms Law

Gihimoan na gayud og kausaban sa atong mga magbabalaod ang Republic Act 8294 (Firearms Law) nga klaro kaayo nga gituyo paghimo ka niadtong 1997 aron lang mapaboran ang pipila ka dinakpan.

Dunay uban nga wala malipay sa pagkahimo nga balaud sa Republic Act 10591 kay gusto lagi kuno nila ang “gunless society.” Wala man gud nila masabti kon unsa ang resulta sa pagka mugna sa bag-ong balaod.

Wala sila masayod nga human gipirmahan ni Presidente Aquino ang Republic Act 10591 kaniadtong Mayo 29, mipalig-on kini sa kampanya batok sa mga tawo nga maghupot og dili lisensyado nga mga armas.

Sa R.A. 8294 ang usa ka tawo nga madakpan paghupot og dili lisensyado nga armas unya nakahimo kini og laing krimen dungan sa iyang pagkasikop, adto ra siya sa laing kaso makonbikto ug dili sa illegal possession of firearms.

Abi ninyo og ngano? Ang Section 1 sa R.A. 8294 naglatid nga ang madakpan nga maghupot og armas nga walay lisensya mahimo nga makonbikto sa balaod, apan gibutangan man og pakapin “Provided that there is no other crime committed by the person arrested.”

Naa diha ang problema kay pananglit panahon sa election period ang usa katawo madakpan sa paghupot og armas nga walay lisensya, adto ra siya makonbikto sa paglapas sa Gun Ban ug dili sa Illegal Possession of Firearms.

Sama nga kon ang tawo nga madakpan sa pagdala og armas nga walay lisensya unya mosukol ug kulatahon niya ang polis nga nagdakop kaniya, dayon ikiha siya'g illegal possession of firearms ug Direct Assault, aw anha ra siya sa direct assault makonbikto.

Bisan ang mga Supreme Court justices dugay ra nga nakapanglingo-lingo kay dili man gayud makonbikto ang dinakpan sa illegal possession of firearms kon may lain siya nga kaso nga nahimo dungan sa pagkasikop.

Masabot man gud nga gihimo ang R.A. 8294 kaniadto aron mapaboran ang usa ka artista nga napriso kay nadakpan nga nagdala'g daghang armas.

Niining bag-ong balaod, giwagtang na ang kontrobersyal nga lagda sa R.A. 8294 ug sa ato pa makonbikto na gayud ang mga madakpan pagdala'g walay lisensya nga armas bisan og may lain pa sila'ng kaso.

Gani gilatid pa sa R.A. 10591 nga kadtong madakpan nga makahimo'g laing salaud unya gamay ra og silot, adto siya konbiktohon sa illegal possession of firearms nga mas daku og sentensya.

Giklaro sa bag-ong Firearms Law kon kinsa kadtong mga tawo nga maisip nga anaa sa kakuyaw ang kinabuhi tungod sa ilang mga propesyon nga katugotan nga makahupot og armas, ug apil niini kadtong tinuod nga mga sakop sa media ug mga pari.

Apan dugay na man nga ang media, abogado, pari, ug ubang mga professionals nga na ka palisensya og armas? Wala man usab mag-ingon ang balaod nga abi kay gitugotan ang mga abogado, media ug pari nga pahupton sila'g pusil nga dili nalang sila pakuhaon og mga dokumento.

* * *

Duna 'say laing bag-ong balaod nga gipirmahan ni Presidente Aquino, ang Republic Act 10575, nga maghatag og dagko nga bonus sa mga piniriso nga magbinuotan samtang anaa sila sulod sa bilanggoan aron sila makagawas pagdali.

Sa unang duha ka tuig nga pag-estar nila sa prisohan kon magbinuotan lang, hatagan ang binilanggo og bonus nga bali'g 20 ka adlaw sa matag buwan. Sa ato pa ang iyang sentensya maibanan og 480 ka adlaw.

Unya sa ikatulo ngadto sa ikalima ka tuig, 23 naka adlawang bonus nga kwentahon sa mata'g buwan. Sa ato pa ibanan na usab og kapin sa duha ka tuig. Gikan sa lima hangtod sa 10 ka tuig, ang bonus tag 25 ka adlaw na sa matag buwan.

Unya kon anaa pa ang piniriso pag-abot sa napulo ka tuig, 30 ka adlaw na sa usa ka buwan ang bonus. Sa ato pa, mapadali na gayud ang paggawas sa mga binilanggo gikan sa bilanggoan.

Sigurado ko nga mopagakpak pag-ayo ang mga binilanggo niining balitaa. Maayo 'sab kay aron makadaginot ang kagamhanan sa kapin sa bilyon ka pesos nga gasto alang sa pagpakaon sa mga binilanggo.