Duha ka mayor ug usa ka babaye

Labihan kamahigalaon sa duha ka mayor nga nahilambigit ni anhing Crisanta Lauro. Nga klarong pulos sila nagtago sa tinuod nga mga sirkumstansiya sa ilang relasyon sa babayeng gibanhigan ug gipatay sa duha ka armadong mga tawo pila ka gutlo human nidunggo sa Dakbayan sa Sugbo gikan sa Masbate niadtong Lunes sa buntag.

Sa buwag nga pakighinabi sa TV Patrol Central Visayas, ang kapuyo ni Lauro nga si Mayor Herminigildo Betonio III sa Pio V. Corpus (PVC) sa Masbate ug ang nangangkon nga bana ni Lauro nga si kanhi mayor Charry Mangacop sa Placer, Surigao del Norte nangangkon nga bugtong nilang tuyo mao nga mapahimutang ang patayng lawas sa biktima.

***

Si Mangacop niingon nga wa siya masuko ni Lauro ug busa di siya angayng dudahan nga nahilambigit sa duguong insidente. Matud ni Mangacop ang timaan sa padayon niyang paghigugma ni Lauro mao ang pagpadayon niya og pangita sa iyang asawa ug sa upat nila ka anak.

Si Betonio di sab andam nga moluwat og bisan unsang pasangil batok ni Mangacop. Gani, andam niyang itugyan ang patayng lawas ni Lauro ug ang upat ka bata  ngadto ni Mangacop. Nihangyo lang siya nga tugotang mahaya ang patayng lawas ni Lauro sud sa pila ka adlaw sa PVC aron nga makapanamilit ang ilang suod nga mga higala.

***

Kumbinsido si Betonio nga iyang mga kaatbang sa politika ang nahilambigit sa pagbanhig ug pagpatay ni Lauro. Nakapasubo niya mao nga gihilabtan ang babaye. Nga bisan aktibo nga nitabang sa iyang pagpangampanya pagka mayor sa PVC alang sa piniliay sunod buwan giisip ni Betonio nga way labot sa ilang politikanhong bugno.

Nagdumili si Betonio pagbutyag og dugang detalye sa iyang nahibaw-an sa nahitabo ni Lauro. Gawas sa pag-ingon nga nihatag na sa kinatibuk-an niyang testimoniya ngadto sa mga imbestigador sa Criminal Investigation and Detection Group (CIDG).

***

Nagkasungi hinuon ang kasayuran nilang Betonio ug Mangacop labot sa pangangkon ni Lauro nga na-anular nang ilang kaminyuon ni Mangacop atubangan sa Office of Muslim Affairs (OMA). Si Betonio nituo ni Lauro apan si Mangacop niinsistir nga di tinuod nga gipa-anular ni Lauro ang ilang kaminyuon. Gani, wa sila magkabuwag dihang kalit lang nikagiw si Lauro uban sa upat nila ka anak gikan sa ilang pinuy-anan sa Quiapo sa Manila.

Niangkon si Betonio nga didto sa Manila sila nagkaila si Lauro.

Gipanghimakak hinuong Betonio ang pasangil ni Mangacop nga gida ni Lauro ang ilang mga sakyanan ug gibalhin sa iyang ngan ang bank accounts sa nakolektang abangan sa ilang buildings sa Manila. Matud ni Betonio iyang nahibaw-an nga dunay iyang kaugalingong mga negosyo ug kabtangan si Lauro.

***

Email: [email protected]