Irihis sa Semana Santa
Tawga kong irihis. Apan wa nako pabenditahi ang lukay nga akong napalit sa tugkaran sa Our Lady of Fatima Parish sa Basak, Mandaue City atol sa pasiunang misa alang sa Dominggo sa Lukay niadtong Sabado sa gabii. Daghang salamat sa pari nga nanukmat sa mga nanimba nga taphaw og pagtuo.
Pagsugod pa lang sa iyang wali, nasuko nang pari kay nakabantay nga gikapoy og barug ang mga nanimba sa pagbasa sa “Pasyon ni Kristo†sud sa 20 minutos. Naguol siya sa ka-imposible na sa pagsubay sa kinatibuk-an nga sakripisyo ni Kristo sa tibuok Semana Santa.
***
Sakto ang pari sa pagpadayag og kaguol sa pag-isip sa pipila ka tawo sa Semana Santa nga kahigayonan pagbakasyon, inay pagpamalandong. Apan niggiya unta siya sa tukma nga paghandom sa pagpasakit ug pagpakamatay ni Kristo, inay nangasaba lang.
Giingnan mi niya nga ang mga lukay simbolo sa kadaogan ni Kristo sa pagsud sa Jerusalem isip Hari sa Israel. Busa di angayng isipon nga sumpa sa mga ungo ug daotang espiritu. Apan ang dakong bahin sa wali gitumong pagpanghimaraot, inay pag-agak, sa mga nasayop pagtan-aw sa lukay. Gisaway pang mga igo lang namalit o nangayo og lukay. Maong akong nasabtan nga wa kinahanglanang pagpa-bendita sa mga lukay.
***
Maong gihinay-hinay na lang nako og gihipos ang tag-P5 nga lukay. Kay mora na hinuon og simbolo sa pagka irihis. Pun-an pa nga tungod sa masuk-anon nga wali nahinumdoman nako ang uban pang mas kuwestiyonable nga mga rituwal sa binenditahan nga mga lukay sa among mga silingan niadtong gamay pa kong bata:
• Gibitay sa mga pultahan ug mga bintana, sinagolan og daghan uyamot nga ahos, aron pag-abog sa mga abat;
• Giisip nga maoy labing epektibo nga panagang batok sa kilat ug sunog; ug
• Pinuhon og gunting aron ilawog sa pinangga nga mga hiniktan pagseguro nga maoy makabuno sa buwang.
***
Di hinuon angayng ihan-ok ang tanang pagbasol sa manimbahay. Kay ang kadagkoan ra sab sa simbahan ang nagpasiugda sa daghan uyamot nga mga rituwal. Nga sa pipila ka parokya gihimong tinubdan sa panalapi. May mga monghe na man gani nga namaligya og mga tipaka sa buwak ug color-coded nga mga kandila.
Pagkahuman gyud sa pangalawat, namauli na mi. Bitbit ang lukay nga wa ma-benditahi. Di tungod kay nangluod ko sa tonada sa wali sa pari. Kon dili tungod kay naneguro ang akong asawa nga kami ang unang makagawas sa parking lot. Ug makalikay sa kaguliyang sa mga sakyanan, labi na inig panggawas ngadto, nga makapasamot sa kahuot sa trapiko, sa nasudnong highway. Maong nahadlok ko nga may sukaranan ang pari sa pagbunyag nako nga irihis.
***
Email: [email protected]
- Latest
