Silang Francis ug Benedict

Bakikaw nga kahimtang sa Vatican: Samtang nagsige og sulbong ang popularidad ni Pope Francis, nag-anam sab kabantang ang mga ebidensiya sa kapakyas ni Pope Emeritus Benedict XVI sa epektibo nga pagpangu sa Simbahang Katoliko sa niaging walo ka tuig.

Ang lab-as nga kadasig di lang sa mga layko nga nagbaha matag adlaw sa St. Peter's Square kon dili apil na sa mga opisyal ug mga kawani sa Vatican dakong sukwahi sa kaluya ug kalibog sa palibot sa lingkoranan sa kalibotanong liderato sa simbahan dayong pahibawo ni Benedict sa iyang resignasyon.

***

Wa magnihit si Pope Francis sa iyang mga mensahe sa pagpasalamat ug pagpasidungog ni Benedict ug pag-awhag sa katawhan pagpangaliya alang sa iyang kahimsog. Gani, pila lang ka gutlo human sa iyang pagkapili sa niaging semana, gitawgan dayon niya sa telepono ang kanhi Santo Papa.

Apan ang pag-insistir ni Francis sa yano niyang estilo sa pangatungdanan--gikan sa pagdumili pagsul-ob sa puwa nga kapa, bulawan nga krus ug puwa nga sapatos sa Santo Papa ngadto sa pagsakay og bus uban sa mga kardinal, pagsalikway sa Latin sa iyang mga wali ug sayon nga pakig-uban sa katawhan, maisip nga hingpit nga pagsalikway sa pagbanhaw ni Benedict sa labing karaang mga tradisyon sa wa pang Vatican II.

***

Maong may sukaranan ang mga panagana sa kahigayonan nga may motumaw nga tensiyon sa umaabot nga panagtagbo nilang Francis ug Benedict sa Castel Gandolfo. Niinsistir unta si Francis nga magtagbo sila sa di pang iyang inugurasyon. Apan nilampos ang iyang mga magtatambag pagkumbinser niya nga hingpiton ang pagbanos sa Vatican sa di pa makigsulti sa iyang gipulihan.

Ang bisan unsang kabalaka sa panagsungi nilang Francis ug Benedict napakalma hinuon sa pasalig sa nauwahi nga ihatag ang hingpit niyang pagtahod ni bisan kinsang mapili pagpuli niya. Di hinuon mabasol ang mga nagduda. Kay mao ni labing unang higayon nga nagkaabot ang duha buhi nga Santo Papa sa niaging 1,300 ka tuig.

***

Apan ang kainit sa kalibotanong paghangop ug pagpasidungog nga nadawat ni Pope Francis di angayng isipon nga pagsalikway sa kabilin ni Benedict. Managlahi ang ilang gigikanan busa di makiangayon ang pagpaabot nga managsama ang kalidad sa ilang liderato. Si Benedict scholar samtang si Francis aktuwal nga nagduma og artsidyosesis. Maong mas sayon alang ni Benedict ang pagpalambo ug pagpasabot sa mga doktrina sa simbahan. Sama nga mas ganahan si Francis sa pagpalambo sa mga doktrina sa mga paagi nga mag nagtugkad sa yuta.

Samtang di kapugngan ang pagtandi sa mga estilo nilang Francis ug Benedict, di makiangayon ang pagdeklarar sa usa nga maoy mas maayo. Pulos sila pinili sa samang proseso sa managlahing mga higayon pagtubag sa managlahing mga panginahanglan.

***

Email: [email protected]