Amihan sa Panglao ug Maribago

Nagkakusog nga hanging amihan maoy gibasol ni Direktor Oscar Tabada sa Pagasa sa Kabisay-an sa pag-us-os pag-ayo sa bagyong “Crising.” Nga sama sa bangis nga bagyong Pablo didto niigo sa habagatang Mindanao. Maayo na lang nga hinay rang hangin. Mas seryusong hulga ang kadaghan ug kalapad sa gibubo nga uwan.

Amihan say gitumbok nga hinungdan nga ang labing uwahing mga bagyo nga nisud sa nasud, didto na magsugod sa Mindanao. Sukwahi sa naandan sa nangaging daghan nang katuigan nga nagsugod sa Samar ug niigo sa nagkalainlaing bahin sa Kabisay-an apil na sa Sugbo.

***

Nakatilaw ko sa kakusog ug kakalit sa amihan. Dihang nakakuyog sa pamilya ni Consul Emeritus Arcadio “Dodong” Alegrado paglawig gikan sa Bluewater Panglao Beach Resort sa Panglao, Bohol paingon sa Maribago Bluewater Beach Resort sa Maribago, Lapu-Lapu City. Salamat sa amihan, ang duha ka taknang biyahe nainat ngadto sa pito.

Nanakay mi sa usa sa bangka ni Alegrado, ang “Luke Boy.” Nga maoy iyang gisakyan kuyog sa iyang anak, si Austrian Consul Julie Alegrado-Vergara, gikan sa Maribago paingon sa Panglao. Kuyog ko sa mga sakop sa iyang pamilya nga di sama kaisog. Nga gipasakay og fastcraft paingon sa Tagbilaran. Aron ingnong isog, nitanyag ko pag-uban ni Alegrado sa bangka balik sa Sugbo.

***

Haskang nindota sa dagat sa among pagbiya dayong udto niadtong Sabado. Human sa pila ka gutlo, nihuros ang amihan ug nidagko ang bawod. Malampusong nalikayan sa mga bangkero ang labing kuyaw nga bahin sa nag-aliwaros nga dagat. Apan nalangay ang among paglawig. Ug labihan namong basaa gikan sa dagkong bawod nga nagpunay og busdak sa bangka.

Gipasaligan ming Consul Alegrado nga mo-arang-arang nang among biyahe kon makatago na taliwa sa duha ka dagkong isla dayon namong tabok sa kadagatan sa Bohol paingon sa Sugbo. Apan wa molunga ang amihan. Ug nisamot pagdagko ang bawod.

***

Saputon gyud ko matag sakay og barko. Gikan sa nagkaguliyang nga pantalan. Ngadto sa kasagarang pagkalangay sa mga biyahe. Gikan sa kamahal sa mga baligya sa canteen. Ngadto sa usahay pagkadaot sa airconditioning units. O pagkapalyar gyud sa mga makina sa barko. Samtang nagtagamtam sa kaparat sa among mga baba, kaming tanang sakay sa bangka nagkataw-anay sa kalahi sa among kahimtang.

Apan di nako ibaylo ang talagsaong kasinatian. May talagsaon gyong kahinam ug katagbaw matag higayon nga mahiagom ka sa kinaiyahan. Matag karon ug unya, nagkinahanglan ta ning maong mga pagsuway. Aron pagsukod asa kutob ang atong lahutay ug pagsalig. Ang labing tam-is nga ganti mao ang pagkabantang sa bayhon sa Sugbo gikan sa kalaworan. Ug ang luwas nga pagdunggo bawon ang bililhong mga pagtulon-an.

***

Email:  [email protected]