Wanted sa Vatican: Lider, di scholar
Usa mga nabisto sa Vatileaks ang pagpanggawas sa tinagoang mga dokumento sa Vatican mao ang hingpit nga pagtahan ni Santo Papa Benedict XVI sa tahas pagduma sa Vatican ngadto sa iyang pangabaga. Ug gitingob ang iyang panahon sa pag-umol sa mga doktrina sa Simbahang Katoliko ug pagsuwat og tulo ka sunudsunod nga libro pagpahinumdom sa katawhan nga si Kristo ang sentro sa atong kinabuhi.
Sa ato pa, bisan natudlo nang Santo Papa, igo lang gipadayon ni Benedict XVI ang iyang gimbuhaton atol sa pamunoan sa iyang gisundan nga si Beato Juan Pablo II. Ambot tungod ba kay mas ganahang magtuon kay sa pakigtagbo sa daghang katawhan, o di lang gyud maayong tagduma.
***
Ang pangabaga ni Benedict XVI nga gihulagway nga mas hawod ug mas gamhanan kay niya mao si Kardinal Pietro Evasio Bertone. Nga mas dako pa gyud ang papel nga huptan human sa resignasyon ni Benedict XVI karong Pebrero 28 hangtod sa pagkapili sa bag-ong Santo Papa sunod buwan.
Labing suod nga mga higala ug mga kawani ni Benedict XVI nipasidaan niya mahitungod sa giingong mga maniobra ni Bertone. Pagpalig-on sa iyang gingharian di lang sa Roma kon dili hasta na sa Milan ug ubang mga teritoryo. Apan kanunayng giduphan ni Benedict XVI si Bertone. Nga maoy gituohang nakapugos sa butler ug ubang sinaligan sa Santo Papa pagpakita sa kaliboan ka sekretong dokumento ngadto sa media.
***
Pipila sa kasayuran nga makadaot ni Bertone nga nabisto tungod sa Vatileaks:
• Iyang gipalagpot ang dakong opisyal sa Vatican nga nibutyag og anomaliya ug gihimo na lang embahador sa Vatican ngadto sa Estados Unidos;
• Iyang gipalagpot ang pangu sa Vatican Bank nga nagdumili pagtuman sa iyang sugo pagpalit og usa ka tambalanan nga nahilambigit sa mga kasong pangurakot; ug
• Iyang gipatudlo ni Benedict XVI ang iyang mga alyado sa College of Cardinals aron pagsegurong mas dako ang iyang tingog sa pagpili sa sunod nga Santo Papa.
***
Si Santo Papa Benedict XVI mao hinuoy labing dakong pildero sa Vatileaks. Segun sa mga eksperto sa Simbahang Katoliko makauuwaw ang pagkabisto nga gawas nga di si Benedict XVI ang tinuod nga nagduma sa Vatican, inutil pa gyud sa paghiusa sa labing dagkong mga haligi sa simbahan ug sa pagbadlong sa eskandaluso nilang panag-unay.
May mga tigpaniid hinuon nga nangagpas nga ang wa mahimo ni Benedict XVI sa niaging walo ka tuig mahimong mapatuman tungod sa iyang resignasyon. Kay ang dakong buslot sa iyang liderato segurong matapakan sa conclave nga ipatawag na sa tungatunga sa sunod buwan. Kinabag-an sa mga kardinal gipaabot nga mopili og Santo Papa nga lahi ni Benedict XVI—takos nga tagduma nga di malipat sa pagsuwat og mga libro.
***
Email: [email protected]
- Latest
