Si Vidal ug ang Santo Papa

Unang nakadani sa pagtagad ni Archbishop Emeritus Ricardo Cardinal Vidal ngadto ni Cardinal Joseph Ratzinger, pila ka tuig sa wa pa mapili nga Santo Papa, mao ang talagsaon niyang kalantip. Isip dean sa College of Cardinals, si Ratzinger ang nagduma sa mga tigom ug naminaw sa nagbuntaog nga mga suliran nga gipabuhagay sa mga kardinal gikan sa nagkalainlaing bahin sa kalibotan.

Matud ni Vidal hilom lang si Ratzinger nga naminaw nila. Bisan nilapas sa gitakdang walo ka gutlo, wa niya pahunonga. Wa siyay papel ni bolpen. Apan matag human sa taho, iyang gisubli sa usa o duha lang ka sentences.

***

Bisan siyay sinaligan ni anhing Santo Papa Juan Pablo II, si Ratzinger napanid-an ni Vidal nga yano og linihokan ug sinultihan. Sayon rang sugaton ug pakigsultihan. Way bisan unsang pangutana nga gibalibaran. Tanang nagpahulagway uban niya gipaundayonan.

Nabantayan sang Vidal nga ganahan si Ratzinger nga mopalambo sa iyang katakos pagsulti og Iningles. Maong kanunay nga niuban sa mga tigom nga giduma ni Vidal sa Vatican, dihang gitahasan siya pagpangu sa usa sa mga synod, kay Iningles man ang ilang istorya. Wa sab mauwaw si Ratzinger nga nangayo og katin-awan sa bag-ong mga terminong Iningles nga iyang nabatian.

***

Di gawasnon si Vidal nga mosulti sa bisan unsang detalye sa bugtong conclave nga iyang naapilan walo ka tuig ang nilabay. Nga nisangpot sa pagkapili ni Ratzinger nga nipili dayon sa ngan nga Benedict XVI. Apan gihulagway ni Vidal ang piniliay nga usa sa labing mubo sa kasaysayan.

Kay kasagaran sa mga kardinal nakaila ug nakadayeg sa talagsaong katakos ni Ratzinger pagpuli pagduma sa Simbahang Katoliko. Matud ni Vidal mas ganahan hinuon ang Santo Papa nga magtuon ug magsuwat, nga gipamatud-an sa daghang libro nga iyang namantala, kay sa pagdiskurso ug pakigtagbo sa daghang katawhan. Nga sayon ra kaayo alang sa iyang gipulihan nga si Juan Pablo II.

***

Kataposang gikasulti ni Vidal ang Santo Papa atol sa canonization rites ni San Pedro Calungsod sa Roma sa niaging tuig. Dasig ug malipayon kaayo si Benedict XVI nga nihangop sa baga nga delegasyon sa Sugbo ug sa Pilipinas. Gipasalamatan siyang Vidal sa sayo nga pagbayaw sa labing unang Bisaya nga Santo.

Atol sa misa sa canonization, nabantayan ni Vidal nga naglisod na paglihok ang Santo Papa. Duha na ka pari ang niagak niya pagsaka sa altar ug mobile platform nay gitungtongan nga wa na kinahanglana nga molakang pa siya. Nakumbinser si Vidal nga ang kasakit ug kaluya sa panglawas ug panghunahuna maoy nakapakumbinser ni Benedict XVI sa paghimo sa gihulagway niyang labing lisod ug labing isog nga hukom pagkanaog sa katungdanan.

***

Email: [email protected]