Walay hakutay

Karong hapon, dunay dakong kalihukan ang United Nationalists Alliance (UNA) ingon man ang mga politikanhong grupo nga iyang alalay dinhi sa Sugbo.

Dakong rally ang ilang ipahigayon diha sa Plaza Independencia sa mga kandidato nga alalay sa UNA, sama sa Team-RAMA ug One-Cebu.

Alang kanako, dili tingali maayo nga gamiton sa mga politiko ang mga resources sa kagamhanan sa ilang kalihukan sama sa mga sakyanan nga mohakot sa mga dumadapig paingon sa plaza.

Sa adlaw sa eleksyon, mahimong ang mga sakyanan sa kagamhanan, apil ang mga sakyanan sa barangay, gamiton aron ihatod sa mga voting centers ang mga botante basta dili lang sila pugngan pagpili kinsa ang ilang botohan.

Ang Section 31 sa Republic Act 9006 kon Fair Election Act naglatid nga gidili ang paghatag og mga transportasyon alang sa mga motambong sa politikanhong kalihukan.

Nalatid kini sa mga “prohibited acts” sa maong balaod. “It is unlawful for any candidate, party or any person to give or accept, free of charge, directly or indirectly, transportation, food and drinks, or anything of value during and within the five hours before and after a public meeting, or to give or contribute, directly or indirectly, money or things of value for the purpose.”

Sa ato pa, manubag ‘sab diay sa balaod bisan gani ang mga tawo nga modawat sa libre nga transportasyon nga ihatag sa mga tigpasiugda sa politikanhong kalihukan.

Apan dili maisip nga illegal kon ang mga dumadapig hakuton paingon sa Plaza Independencia karong buntag hangtod sa udto kay alas 5 pa man sa hapon magsugod ang rally.

Bati man gud tan-awon kon ang mga tawo nga motambong sa political gatherings hakuton sa mga sakyanan sa kagamhanan kay maisip kini nga napugos lang ang uban ug dili kinasing-kasing ang ilang pagtambong.

Pasagdi ninyo ang mga tawo nga moadto sa dapit nga himoan sa political gathering, ayaw ninyo hakuta kay pinaagi niini inyong mahibaw-an kon daghan ba ang misuporta kaninyo.

Alang kanako mas maayo man gani nga ang mga politiko dili mogamit og entertainers sa ilang political gatherings kay posible man nga daghan sa mga motambong motan-aw ra sa mga artista o maglilingaw.

Gisukna nako si Cebu City Election Officer Marchel Sarno kabahin niining maong isyu. Matud sa election officer nga kadtong dunay reklamo, makahimo sila sa pagpasaka og reklamo adto sa Comelec-Manila law department.

* * *

Pastilan bitaw, kun subayon lang g’yud nimo ang balaod unya estrikto kini nga aksyonan sa Commission on Elections, pwerteng daghana sa mga masilotan.

Apan unsaon, dili kaayo hait ang ngipon sa Comelec nga mogukod sa mga nakahimo’g kasaypanan.

Sama anang dagko kaayo nga billboard sa mga politiko nga dugay na kaayo gipangbutang sa bisan asa nga lugar, sigurado ko nga dili kini mahilabtan hangtod nga moabot na lang ang eleksyon.

Duna ba gu’y mga politiko nga nabilanggo tungod sa pagpataka og butang sa ilang campaign materials gawas sa gitudlo nga Comelec common posters area?

May politiko ba nga pildero sa eleksyon nga nabilanggo kay wala mosumiter sa iyang Statement of Contribution and Expenses? Mora’g wala g’yud ko makadungog kon duna man.

Bisan gani si kanhi Mayor Alvin Garcia nga gipasakaan na unta og election-related offense didto sa hukmanan apan gipa-withdraw ug hangtod karon nahanaw lang nga daw aso.

Ang silot sa mga mahukmang sad-an paglapas sa election-related laws mao ang gikan sa usa ngadto sa unom ka tuig nga pagkabilanggo, apan dili maka-avail og probation.. sa ato pa mabilanggo g’yud sila.