Tabang alang ni Marlon

Nahatag na namo ngadto sa pamilya ni anhing Marlon Bellita ang dul-an sa usa ka milyon ka pesos nga natigom sa fund-raising campaign nga gilusad human siya na-stroke nga nisangpot sa iyang kamatayon sa Nobyembre sa niaging tuig.

Gitumong unta ang pundo pagbayad sa nagbuntaog nga obligasyon sa iyang duha ka semana nga pagpabilin sa intensive care unit (ICU) sa Chong Hua Hospital. Apan tungod sa dakong diskuwento nga gihatag sa Chong Hua ug sa pag-impas sa ABS-CBN Corp. sa balanse,

nakahukom mi pagkuha na lang og scholarship alang sa mga anak ni Marlon.

***

Niabot og kapin P612 mil ang natigom sa bank account nga gituyo namo pag-abli sa Bank of the Philippine Islands (BPI) sa Mandaue City M.C. Briones Highway branch alang sa kampanya. Pormal na namong gitak-opan ang account niadtong Biyernes. Giluwatan mi sa bangko ug duha ka manager’s checks: Kapin sa P400 mil alang sa scholarship ug kapin sa P200 mil alang ni Hazel, ang biyuda ni Marlon.

Ang duha ra hinuon ka anak ni Marlon ang ni-qualify sa education plan sa kolehiyo sa PhilPlans sa Ayala Center. Ang kamaguwangan, nga 3rd year na sa high school, di na maapil sa ilang gitanyag nga packages.

***

Manggihatagon nga suking tigpaminaw ni Marlon maoy niabaga sa balanse sa matrikula sa tulo ka anak ni Marlon sa Holy Rosary School sa Pardo alang ning tuig tingtungha. Masaligon kong may mga motabang gihapon sa pagtuman sa damgo ni Marlon nga makatiwas ang tulo niya ka bata sa pag-eskuyla.

May mga nitanyag sa pag-abaga sa gasto kon makatungtong na sa kolehiyo ang kamaguwangan ni Marlon atol sa fund raising campaign sa niaging tuig. Maikog ming maningil. Apan mangahas mi sa pagpanuktok sa ilang mga kasingkasing ug pagpahinumdom nila dayong tapos sa sunod tuig tingtungha.

***

Padayong nakadawat si Hazel og hinabang gikan sa mga natandog sa pagtaliwan ni Marlon. May umaabot siyang mga benepisyo gikan sa ABS-CBN, ang employer ni Marlon, ingon man pension niya ug sa mga bata gikan sa Social Security System.

Nagtrabaho na si Hazel sa buhatan ni Talisay City Vice Mayor Alan Bucao, suod nga higala ni Marlon. Gidestino siya ni Bucao sa library aron nga makatuon pangandam sa plano ni Hazel pagkuha sa Licensure Exam for Teachers (LET), nga wa ipakuha ni Marlon niya niadto aron makatingob pag-atiman sa mga bata.

Hangtod karon di kapugong si Hazel paghilak kon makadungog sa mga tawo nga padayong maghisgot ni Marlon. Sama sa dentista nga nag-atiman sa ilang kamaguwangan nga, dihang nahibawong anak ni Marlon ang iyang pasyente, nilaslas sa ilang bayranan og katunga.

***

Email: [email protected]