Duha ka pagkakonbikto ni Garcia

Sud lang sa usa ug tunga ka buwan, duha ka sunud-sunod nga pagka konbikto sa mga kasong administratiba ang nahiagoman ni suspended governor Gwen Garcia. Di na hinuon mapun-an ang unom ka buwan nga suspenso nga gipahamtang sa Malakanyang batok niya tungod sa unang kaso. Kay napapas nang silot sa ikaduha apan mas karaang kaso tungod sa iyang pagdaog sa piniliay niadtong 2010.

Pulos wa magdali ang mga buhatan sa gobyerno nga nangimbestigar sa mga kaso ni Garcia. Ang unang kaso naabtan og duha ka tuig. Ang ikaduhang kaso naabtan gyod og upat ka tuig.

***

Ang mas karaang kaso mao ang grave misconduct nga gipataban sa labing menos tulo ka kasong kriminal nga giatubang ni Garcia sa Sandiganbayan tungod sa kuwestiyonableng pagpalit sa Balili property sa Tinaan, Naga City nga ang dakong bahin nakaplagan nga nahimutang ilawom sa dagat.

Kay 2008 pa man ang palit, ang pagkakonbikto ni Garcia gilamoy sa Aguinaldo doctrine nga nisalikway sa administrative liability sa mga transaksiyon nga nahimo sa wa pang kadaogan sa piniliay. Di na sab ikapahamtang ang silot sa laing sinumbong, si kanhi board member Juan Bolo, kinsa napilde sa samang piniliay sa 2010. Apan mamutos na kay mangataktak gikan sa Kapitolyo ang ilang kaubang mga sinumbong nga silang Atty. Roy Salubre, Engr. Eulogio Pelayre, Emme Gingoyon ug Anthony Sususco.

***

Ang pagkakonbikto nilang Garcia ug kaubanan nisunod sa pagbasura ni Ombudsman Conchita Carpio-Morales sa ilang motion for reconsideration. Nihawan ni sa agianan sa pagsugod na sa husay sa mga kasong kriminal batok ni Garcia sa Sandiganbayan. Nga sa sayo pa nagdumili paglibkas sa tulo ka hold departure orders nga ilang giluwatan batok sa sinumbong.

Kon mabasahan na sa mga kaso, si Garcia gitakdang pahamtangan dayon sa Sandiganbayan og laing unom ka buwan nga suspenso. Nga, lahi sa nalangay nga silot sa kasong administratiba sa Balili, di mapapas bisan pa kon makadaog siya sa piniliay karong Mayo.

***

May kapuslanan hinuong nakit-an ang prosekusyon sa pagkakonbikto ni Garcia sa kasong administratiba: Maggamit ni nila pagpalig-on sa mga kasong kriminal batok ni Garcia kon makabuylo na unya ang husay sa Sandiganbayan. Si Morales, sa iyang bahin, nipahibawo sab nga mas nilig-on ang mga kaso batok ni Garcia tungod sa pagkumpisal sa iyang kaubang mga sinumbong:

• Ang magtiayong Romeo ug Amparo Balili niangkon nga way bisan unsang survey nga napahigayon sa ilang luna sa wa pa pirmahi ang memorandum of agreement (MOA) sa pinalitay tali nila ug ni Garcia; ug

• Si Bolo nikumpisal nga gisultihan niya si Garcia di lang kausa kon dili kaduha gyud nga ang luna naa mahimutangan daplin sa dagat.

***

Email: [email protected]