Halad ni Sir Dodong

Mangahas ko pagdapit nimo sa dakong piyesta sa libreng mga pangalagad tibuok adlaw karong Sabado sa Gullas Medical College sa Banilad, Dakbayan sa Sugbo. Si Dr. Jose “Sir Dodong” Gullas, mosaulog sa sumad sa iyang adlaw’ng natawhan uban sa labing kabos ug labing nagkinahanglan nga mga Sugbuanon.

Sa ikatulong sunudsunod nga tuig, ang JRG Halad Foundation nipalihug namo sa DYAB 1512 khz ug ABS-CBN Cebu sa pagpahibawo pinaagi sa radyo ug telebisyon sa taas uyamot nga kutay sa mga pangalagad nga kapahimuslan sa mga mutambong sa piyesta sa paghalad ug pagtinabangay.

*   *   *

Gipaabot nga labing dugukon nga pangalagad karong Sabado mao ang libreng konsultasyon ug libreng tambal alang sa mga pasyenteng bata ug dagko, libreng limpiyo ug ibot sa ngipon, libreng paghiling sa mata ug antipara, libreng tuli alang sa mga batang lalaki, libreng cervical cancer screening ug libreng laboratory services, sama sa random blood sugar (RBS) ug electrocardiography (ECG).

Maapil sa kalihokan ang pagtubag sa dako ug dinaliang panginahanglan sa dugo alang sa mga biktima sa katalagman, mga aksidente ug mga balatian sa Sugbo ug kasilinganang mga lalawigan. Gidasig ang tanang nagpakabana nga mga Sugbuanon sa di pagmakuli paghatag sa gasa sa kinabuhi pinaagi sa tibuok adlaw sab nga blood donation activity.

*   *   *

Laing hugopan karong Sabado mao ang libreng pag-ayo sa gubaon nga cellphones pinaagi sa technicians sa Technical Education and Skills Development Authority (Tesda). Kapahimuslan sab ang libreng wellness services, sama sa tupi, masahe, foot reflexology ug acupuncture. May libreng mass feeding sab alang sa mga bata pinaagi sa The Freeman Foundation.

Libre sab ang veterinary services alang sa mga iro ug iring nilang Cebu City Veterinarian Dr. Alice Utlang ug kaubanan. Libre ang pangalagad sa mga abogado sa Gullas Law School ug libre ang seminars sa basic bookkeeping, honeybee raising, ilegal nga drugas ug cooking demonstration.

*   *   *

Mahinungdanon sang bahin sa dakong piyesta sa mga pangalagad karong Sabado ang one-stop shop sa mga buhatan sa gobyerno nga maoy labing daghan og mga kliyente: Ang National Statistics Office (NSO), Social Security System (SSS), Government Service Insurance System (GSIS), Pag-IBIG, Philippine Health Insurance Corp. (PhilHealth) ug Department of Foreign Affairs (DFA).

Buksan ang tibuok adlaw nga kalihokan pinaagi sa Santos nga Misa sa alas-7:30 sa buntag. Ang talagsaong gasa sa gugma ni Sir Dodong naglakip sab sa mass wedding sa 38 ka magtiayon ug confirmation sa mga tinun-an sa University of the Visayas (UV) Main Campus.

Sa among mga Halad sa Kapamilya, nahimo lang ming taytayan tali sa mga may katakos pagtabang ug sa mga nagkinahanglan og tabang. Sa Halad ni Sir Dodong, siya ang labing dakong tinubdan sa mga hinabang.

***

Email:  [email protected]