Taliwa sa kangitngit, nibiya si Gwen

Kaingon nako nga seryuso si suspendidong gobernadora Gwen Garcia sa iyang pasidaan nga kinahanglang patyon una siya sa di pa mapapahawa gikan sa iyang buhatan. Kaingon nako nga matinud-anon sa iyang panumpa nga magpabilin sa Kapitolyo ug kinahanglang gamitan una og puwersa sa di pa mabunlot gikan sa iyang buhatan.

Kaingon nako nga giisip ang iyang determinadong pagpabilin sa Kapitolyo nga simbolo sa pagpanalipod sa mandato nga iyang nadawat sa niaging piniliay gikan sa mga Sugbuanon. Kaingon nako nga giisip ang pagpabilin sa iyang buhatan nga timaan sa pagprotesta sa giingong pagpanggukod sa Malakanyang.

***

Niggawas si Garcia sa Kapitolyo niadtong Martes sa gabii. Nga wa magtagad pagpasabot sa mga Sugbuanon nganong gisukwahi ang iyang saad. Wa himoa ang iyang naandan nga pagpatawag sa mga sakop sa media. Wa gani magtagad pagsubli sa naandan nga pagtapok sa iyang mga dumadapig aron nga kakuyogan siya ug kapakpakan sa iyang kaisog pagbarog batok sa gihulagway nga ilegal nga suspension order batok niya.

Nganong nakaako man pagbiya sa iyang buhatan? Nganong gibakwi man ang pasidaan nga magpakamatay aron pagpanalipod sa iyang katungdanan? Nganong hilom ug niyuhot man siya paggawas samtang ataon ang kangitngit sa kagabhion ug samtang gituohan nga way usang nagtan-aw?

***

Apan may mga mata nga nakakita sa paggawas ni Garcia. May nakahunghong dayon sa kapolisan nga nibiya na sa iyang katungdanan. Nidason ni sa sibaw nga mga huhungihong nga si Garcia nagsige na og gawas inig tikyop sa kangitngit ug mobalik lang inigka buntag. Gikataho man gani nga sa wa pa mosayaw sa niaging Sinulog Grand Parade nagsige na siya og praktis sa gawas uban sa mga mananayaw sa Liloan.

Maong sa pagbukhad sa kahayag pagka sunod adlaw, Miyerkules, gisusi dayon sa mga polis naa pa ba sa iyang buhatan si Garcia. Wa nay Garcia nga ilang nakit-an. Mga kaabag na lang ni Garcia ang nagtikaw-tikaw. Maong wa maglisod pagkandado sa buhatan.

***

Unsa man diayng matanga sa protesta ang gilusad ni Garcia? Nganong siya mismo naglipatlipat man sa iyang mga dumadapig nga gipatuong determinado siyang magpabilin sa iyang buhatan? Nganong nagpatugatuga man og sugod nga di man diay siyang kalahutay ni katiwas?

Samtang naminaw ang mga Sugbuanon sa mga taho sa pagtak-op na sa buhatan ni Garcia, gipahibawo sa Professional Regulation Commission (PRC) nga daghang Sugbuanon ang nanghawod ug nakasud sa Top Ten sa Nursing Licensure Examination (NLE) pinangulohan sa mga gradwado sa Cebu Normal University (CNU). Nga maoy labing sipa nga mensahe ning pagkabisto sa kataphaw sa protesta ni Garcia: Magpadayon ang naandang kinabuhi sa mga Sugbuanon ma-naa man sa sud o sa gawas sa Kapitolyo si Garcia.

***

Email: [email protected]