Unsay inyong gihimo ani?

Gikuyawan ko nga kon adunay tawo nga magbinuang, daghan g’yud ang mangamatay tungod kay ang mga kawani sa kagamhanan wala man makapakgang niining pagbutang og mga baligya nga tubig diha sa aseras.

Gitug-anan ko ni Cebu City Health Officer Stella Ygoña nga wala itugot kining pagbutang og “Automated Tubig Machines” diha sa aseras nga walay nagbantay. Apan nganong wala may gihimo ang City Hall ani?

Nakabantay mo nga daghan man nga water dispensers nga anaa lang sa aseras gibutang? Kana ba nga mohulog ka lang og usa ka peso ug makainom ka na og bugnaw nga tubig.

Ang tinuod, mas arang-arang na lang kini kon itandi sa moinum kita og iced water kay klaro man g’yud kadto nga hugaw. Apan tukma si Dr. Ygoña kay kon ang gitawag og ATM anha sa aseras ibutang nga walay nagbantay, mahimo nga kini mabinuangan.

Kon dunay yabag og utok unya butangan og hilo ang agasanan sa tubig, o kaha ang plastic nga anaa ra gibutang sa kilid sa ATM nga maoy sudlan sa tubig, dili kaha daghan ang mangamatay?

Pananglit ang ATM anaa sulod sa tindahan nga dunay kanunay nagbantay, walay problema kay mataha tingali ang gusto nga mobinuang. Apan nakakita ko og ATM nga anaa gibutang ilawom sa hagdan sa skywalk sa Barangay Day-as.

Duna pa’y daghan nga anaa sa ubang aseras dinhi sa dakbayan. Bi, hagiton nato ang mga opisyal sa dakbayan nga himoan nila og diha-diha nga kampanya kining maong kalihukan mentras wala pa’y madisgrasya.

* * *

Sunod-sunod ang pagpangronda sa kapolisan batok sa mga tighimo og mga armas diha sa dakbayan sa Danao kaniadtong miaging semana. May nangutana kanako kon ngano nga dili man ang kapolisan sa Danao ang mihimo sa pagpanakop.

Sa wala pa ko motubag, gibuhian usa nako ang usa ka pahiyom. Kon gusto ka pa nga magdugay sa imong pwesto, ayaw na lang pagpatuga-tuga paghimo’g kampanya batok sa mga tighimo og armas sa Danao kay sila giprotehean sa mga politiko sa maong dapit.

Wala kini malilong kanako kay kapin sa 10 ka tuig ko nga nahimong police/military reporter ug nasayud gani ko kon asa dapit ang ubang tighimo og armas ingon man ang tipiganan sa mga armas diha.

Ang gironda sa mga polis adtong imaging semana, buhatan og armas apan kon ang gironda nila mao pa ang pundohanan sa mga human na nga armas, pwerteng daghana tingali nila nga nakuha.

Nasayud man ko nga nahibalo niini ang mga polis kon asa sila makakuha og daghang armas. Nanginahanglan kini karon sa sinsero nga kampanya sa atong mga polis.

Nakahinumdom ko nga mora’g tuig kadto 2000, pwerte’ng daghana nga mga high powered automatic pistols sama sa UZI sub machine guns nga nasakmit sa mga sakop sa NBI-Manila nga mituyo pag-anha sa Danao.

Dili ko makalimot niadto kay “scoop” nako kadto nga balita nga gihatag ni Koronel (karon heneral na tingali) nga si Charles Calima nga hepe kaniadto sa Regional Intelligence and Investigation Division nga karon gitawag na’g Regional Intelligence Division.

Ang mga sakop sa RIID kaniadto maoy mihatag og suporta sa mga sakop sa NBI-Manila nga mihimo’g “buy-bust” kon nagpatoo nga mamalit sila’g daghang armas.

Tuod, sipong ang daghang armas. Nag-ilogay pa ang mga tigbaligya pagkuha sa ilang mga pusil kay wala magtoo nga ang mga nangompra mga sakop sa NBI.

Panginabuhi kining pagbuhat og armas apan kuyaw kay sayon ra man gud kaayo makaangkon og armas ang mga badlongon sa katilingban. Sama karon, gunban apan ang mga badlongon motoo ba gud sila sa gun ban?