Labing epektibong panagang

Usa ka adlaw human sa duguong pagpamusil sud sa The Chief Justice Fernan Memorial Hall of Justice, ang nabulilyaso nga security agency nagdalidali pagtaod og metal detector. Kini human sila gipangayoan og katin-awan ni Court Administrator Jose Midas Marquez nganong napakyas pagtuman sa kontrata nga nagmando nila pagbutang og metal detectors sa mga ganghaan sa building.

Nikalit lang pagbutho ang metal detector pagka Miyerkules sa buntag. Gitaod dayon sa mga guwardiya, nga nipuli sa girelibohan nga duha ka guwardiya nga nalutsan ni John Pope. Apan nanlipaghong sila sa kauwaw. Depektuso ang metal detector.

***

Padayon na karong gisubli sa buhatan ni Marquez ang kontrata tali sa Korte Suprema ug sa Eagle Matrix Security Agency. Nga mas dako og kahigayonan nga makasohan sa kahaguka sa ilang pagbantay sa Palace of Justice sa Dakbayan sa Sugbo. Kay sa masublian ang ilang kontrata nga gitakdang mapupos na karong tuiga.

Matud ni Marquez gitakda na karong tuiga ang laing hugna sa subasta sa pagpangita sa labing takos nga security agency nga makabantay sa mga hukmanan sa dakbayan. Nga gawas sa metal detectors maglakip na sa pagtaod og closed-circuit television (CCTV) cameras sa tanang agianan ug likoanan sa tanang upat ka andana sa building.

***

Usa sa mga guwardiya nga nalutsan ni Pope niadtong Martes sa buntag niinsistir nga gikapkapan nila ang langyaw. Nalipat sila kay ang kalibre .357 nga rebolber giingong gipalup-itan sa pinilo nga pamantalaan.

Dihang nihagba na si Pope sa tiilan sa hagdanan sa unang andana, nakit-an sa kapolisan ang kalibre .45 nga pistola sud sa bag ni Pope. Nisukwahi ni sa pangangkon sa mga guwardiya. May sukaranan ang mga pagduda nga ang kaputi sa panit, ang paka kaayo nga Iningles ug ang talagsaong gidak-on ug kaagresibo ni Pope maoy nakaaghat sa mga guwardiya pagpalusot lang niya nga way bisan gamay nga kapkap.

***

Makatabang pagpanalipod sa mga maghuhukom, mga piskal, mga abogado, mga kawani ug mga kliyente ang pagpahugot sa seguridad sa mga hukmanan sa Sugbo ug ubang bahin sa nasud. Sama nga ang pag-armas sa mga maghuhukom, mga piskal ug mga abogado makapasamot lang sa hulga sa duguong mga panghitabo.

Mas epektibo hinuong panagang sa kaguliyang ang pagpalambo sa katakos ug kaligdong sa sistema sa hustisya. Aron nga matagbaw ang batakang mga panginahanglan sa kinabag-an sa katawhan alang sa kaangayan. Apan mas lisod ug mas kuti kay sa pag-ilis sa mga guwardiya ug pagtaod og metal detectors ug CCTV cameras ug nagkinahanglan og mas hugtanon nga determinasyon ug mas makanunayon nga lahutay ang paghimong mas kasaligan, mas paspas ug mas makiangayon sa mga piskaliya ug mga hukmanan sa nasud.

***

Email: [email protected]