Hagit sa ligdong nga media
Kon reporter ka nga nadestino sa Kapitolyo, imo ang tanang istorya. Bisan unsay isulti nilang Acting Governor Agnes Magpale ug suspendidong Gobernador Gwen Garcia dakong balita. Di maproblema pagkumbinser sa newsroom nga angayng ipatik o isibya ang imong nahipos nga kasayuran.
Kinahanglan hinuon nga magtukaw ka. Kinahanglang makakuha dayon sa bisan unsang dinalian nga kalamboan sa mga panghitabo. Labi nang si Garcia daghang makit-an sa labing mingawng mga takna sa gabii. Kon maunhan sa kumpetinsiya, goodbye bonut. Segurong masabonan sa imong mga bosing ug malabay sa mas mingaw nga trabaho. Kana kon duna ka pay trabaho.
***
Kinahanglan sab nga magkinto. Tungod sa katandugon sa sitwasyon, mahimong dudahan sa duha ka nagkasungi nga kampo. Kinahanglan nga tugkaron ang tinuod nga gipasabot sa ilang mga sulti aron nga di kapasanginlan og malisya. Kinahanglan sab nga hatagan og managsamang kahigayonan silang Garcia ug Magpale. Kinahanglang way pasangil nga di matubag. Ug ang tubag kinahanglan sang matubag, kon gikinahanglan pa.
Kinahanglan nga magmatngon sa tanang higayon. Kon magtukaw sa buhatan ni Garcia og duha ka oras, angayng mohatag sang Magpale og samang panahon. Ang gitas-on sa hisgot sa kalihokan ni Magpale kinahanglang ambasan sab sa samang gidaghanon sa detalye sa sumbalik ni Garcia.
***
Lisod nang daan ang pagpatubag-tubag sa duha ka kampo. Mas lisod ang mas makahuloganon nga bahin sa imong trabaho: Ang pagpahibawo sa Sugbuanong mga magbubuhis, nga maoy tinuod nga Bosing ni Garcia ug Magpale ug nimo, sa tinuoray nga mga dugokan sa mga isyu sa krisis sa Kapitolyo.
Matagbaw ba lang sa pag-dokumento sa mga pasanginlanay ug sumbalik pasanginlanay? Kutob ba lang sa pagyangu-yango sa bisan unsay isulti sa duha ka kampo? O panahon na nga maghimo og imong kaugalingon nga pakisusi? O kinahanglan na nga maningil og mga dokumento ug mga ebidensiya sa bisan unsang mga pasangil ug mga pangangkon nga luwatan?
***
Mahimo lang hinuon ni kon may igong kaisog ug kaligdong. Gikinahanglan ang kaisog pagsugat sa hait nga mga tinan-awan kon silang Garcia o Magpale ug ilang lunod-patay nga mga dumadapig di ganahan sa makapa-apiki nimong mga pangutana. Gikinahanglan ang kaligdong sa pagbarug ug pagkumbinser sa tanang hingtungdan nga igo lang nagtuman sa imong trabaho kon insultohan o pakauwawan o hudlaton na sa usa o sa duha ka kampo.
Mahimo ni bisan way kaisog ni kaligdong ang imong sibyaanan o pamantalaan. Kon ang mga tagduma motalaw o mopusta na, makahimo gihapon pagpatigbabaw sa kamatuoran. Sa labing makiangayon nga paagi. Ginamit ang tananng katakos ug kasinatian. Kon ang sibyaanan o pamantalaan na mismo ang mogukod nimo, daghan ang kapilian nga mas haom nga alagaran.
***
Email: [email protected]
- Latest
