Dagway sa mga tingog ni Marlon
May problema si Litang Abarquez, konsehal sa Poblacion, Pardo. Gipalihog siya pagpasundayag og pasidungog alang ni Marlon Bellita, bantogang tagduma sa “Rated R” sa DYAB 1512 nga lumad nga Pardohanon. Unsa pa may iyang mapuno sa daghan na uyamot nga mga pasidungog nga nadawat ni Marlon gikan sa labing yano nga mga Sugbuanon ngadto sa labing dagkong haligi sa gobyerno ug simbahan?
Apiki siya sa panahon. Tulo ka semana ray lugway sa pagpangandam. Di siyang kabalibad ni Engineer Ariel Araw-Araw, iyang paryenteng kumpare ni Marlon. Labaw nang Marlon, nga matinabangon kaayo sa iyang mga kawsa.
***
Giprangkahan ni Litang si Ariel sa iyang panagana. Kon patimplahon pa lang unta siya og barbekyu (siya ang tagduma sa bantogang Litang’s BBQ sa Pardo) aron ipamaligya ug ihatag ang halin ngadto sa pamilya ni Marlon, wa siyay reklamo.
Nahibaw-an nakong June Berongan, laing Pardohanon nga kauban ni Marlon sa DYAB, nga dihang nakaumol og konsepto si Litang buylo dayon ang ilang praktis. Kasagaran nakadlawonan sila. Gihulagway ni June si Litang nga istrikta. Bisan gamayng sayop, gipabalik gyud. “Maikog ta sa mga tawo nga mamalit og tiket kon di ni nato tarungon,” gikutlo siyang Star Cabrera, kauban ni Marlon sa “Barangay Idol Reloaded” sa DYAB nga kabahin sa pasundayag.
***
Pag-abot sa gabii sa pasundayag sa Pardo Sports Complex niadtong Sabado, naglisod ko pagtuo sa akong nakita. Recordings sa tingog ni Marlon, iyang mga komedya ug mga kanta sa “Rated R” ang sentro. 50 ka Pardohanon ang gipatabang ni Litang sa paghatag og panagway ug kinabuhi sa nagkalainlaing mga tingog ni Marlon.
Way tihiktihik ang produksiyon. Giusab-usab ang props pagpahaom sa mga kanta ug komedya. Labing makalingaw mao ang sets sa mga sugilanon ni Marlon sa minteryo, classroom ug PUJ. Pulos talagsaon ang abilidad sa mga artista ug mga mananayaw, nga kasagaran gikauban ni Marlon sa nagkalainlaing proyekto.
***
Mao ni ilang gihimo. Gibahin og duha ang stage pinaagi sa telon. Ang luyo naglakip sa backdrop sa higanteng mga hulagway ni Marlon ug sa nag-usab-usab nga sets. Sa atubangan ang banda ni Apple Abarquez, usa sa labing masilakong bituon sa Pinoy Dream Academy (PDA) sa ABS-CBN ug sinagop ni Litang, ug ubang mag-aawit ug mamumulong. Nga gisal-ot samtang gisera ang telon ug giandam ang sunod nga set.
Hapit nang tungang gabii nahuman ang pasundayag. Nga gitapos sa awit ni Ariel nga “Marlon B.,” sa tuno sa “Let It Be,” sa pagpabati ni Litang sa recording sa tingog ni Marlon ni ni-greet sa birthday sa iyang asawang si Hazel sa ngan sa ilang mga anak nga silang Angel Mae, Shunmar ug Mariah Carmel, ug sa emosyonal nga pasalamat ni Hazel.
***
Email: [email protected]
- Latest
