Grand Halad na karong Sabado

Hapit na mahingpit ang pangandam alang sa Grand Halad sa Kapamilya, ang labing dakong piyesta sa libreng mga pangalagad sa Sugbo, tibuok adlaw karong Sabado, Nobyembre 10, sa Main Campus sa Cebu Technological University (CTU). Bisan nabalda ang pangandam sa holidays sa niaging mga semana, inanay nang naumol ang bayhon sa kalihokan nga himuon matag Hunyo ug Nobyembre matag tuig.

Ang Grand Halad karong Sabado kabahin sab sa tibuok tuig nga kalihokan pagsaulog sa ika-25 nga anibersaryo sa pagsibya sa ABS-CBN dinhi sa Sugbo ug Central Visayas karong Hunyo 28, 2013.

***

Gawas sa libreng mga tambal, libreng ibot sa ngipon, libreng laboratory services, libreng legal services, libreng veterinary services ug libreng seminars ug workshops ug one-stop-shop sa nag-unang mga buhatan sa gobyerno, himuon sab karong Sabado ang Kapamilya Megal Local ug Overseas Job Fair nga pasiugdahan sa Department of Manpower Development and Placement (DMDP) sa Dakbayan sa Sugbo.

May mga listahan sa kaliboan ka bakanteng trabaho nga ipasundayag sa CTU Main Campus sa M.J. Cuenco Ave. sa Dakbayan sa Sugbo. Apan ang rehistrasyon, screening ug interview sa employers himuon sa Abellana National School Gym sa eskina Osmeña Blvd. ug R.R. Landon St. sa Dakbayan sa Sugbo.

***

Atubangan sa nag-usbaw nga panginahanglan ug sa nagpadayong kanihit sa suplay sa dugo sa Sugbo ug kasilinganang mga lalawigan, duha ka Kapamilya Blood Donation Activities ang madungan sa Grand Halad sa Kapamilya tibuok adlaw karong Sabado:

• Ang Kapamilya Blood Donation Campaign sa Regional Blood Center (RBC) sa Department of Health (DOH 7), nga naningkamot nga makatigom og igong gidaghanon sa dugo alang sa posibleng mga emerhensiya atol sa National Thanksgiving Mass ni San Pedro Calungsod sa SRP karong Nobyembre 30, nga himuon sa CTU Main Campus; ug

• Ang Kapamilya Blood Donation Campaign sa Chong Hua Hospital nga himuon sa main lobby sa Chong Hua sa Uptown Area sa Dakbayan sa Sugbo.

***

Nagkinahanglan pa mi og dugang boluntaryong mga doktor nga among palihugon sa pagpulipuli pag-atiman sa kaliboan ka pasyente gikan sa alas-6 sa buntag hangtod alas-5 sa hapon. Hangpon sab namo ang dugang pang mga boluntaryo nga mohalad sa ilang pangalagad, panahon ug mga hinabang alang sa labing kabos ug labing masakiton natong mga Kapamilya.

Ang Grand Halad sa Kapamilya pormal nga ablihan pinaagi sa Santos nga Misa sa alas-6 sa buntag sa Kasadya Gym sa CTU Main Campus. Ang misa isibya nga buhi sa DYAB 1512 khz. Gawas sa pagtagbaw sa materyal nga mga panginahanglan, gidapit namo ang kaparian pag-atiman sa espirituwal nga mga panginahanglan sa katawhan, apil nang pagdasig sa bag-ong mga katekista pagsunod sa balaanong mga lakang ni San Pedro Calungsod.

***

 Email: [email protected]